ट्रम्पले दिए गोराहरूलाई हिंसा गर्ने अनुमति, अमेरिकाको भविष्य खतरनाक

डोनल्ड ट्रम्पले श्वेत सर्वोच्चतावादी समूहलाई सीधै भर्त्सना नगर्नु अमेरिकाको राष्ट्रपति निर्वाचन बहसमा सबभन्दा महत्त्वपूर्ण कुरा हो । 

अझ उनले त्यस्तो एक समूह प्राउड बोइजलाई पछि हट्न (स्ट्यान्ड ब्याक) तर तयार रहन (स्ट्यान्ड बाई) भने । 


Advertisement

स्ट्यान्ड बाई केका लागि ? यो त हिंसाको अनुमति दिएको जस्तो भयो । 

ट्रम्पले ख्यालठट्टामै बोल्दै अनि द्विअर्थी बयान दिँदै जातिवादी द्वन्द्व भड्काएको भनी विगतमा पनि आरोप लाग्ने गरेको थियो । बहसका क्रममा पनि उनले खतरनाक तवरले कुतत्त्वलाई भड्काएको आरोप प्रतिस्पर्धी जो बाइडनले लगाए । 


Advertisement

ट्रम्पले जातिवादी विषय उठाएर श्वेत सर्वोच्चतावादी समूहहरूलाई संकेत दिने गरेको भनी प्रायः आलोचना गरिन्छ । विदेशीहरूले अतिक्रमण गरेको भन्दै ट्रम्पले चिन्ता व्यक्त गर्दा श्वेत सर्वोच्चतावादीहरू खुशी हुन्छन् । 

तर संसारभरिका मानिसले हेरेको टीभी बहसमा ट्रम्पले श्वेत सर्वोच्चतावादीहरूलाई संकेत दिएको मात्र नभई ठीक गर्‍यौ नै भनेको देखियो । उनले त्यस्ता समूहलाई प्रशंसा गर्दै शिर थपथपाएको जस्तै देखियो । 

मोडरेटर क्रिस वालेसले सोधे, ‘तपाईं श्वेत सर्वोच्चतावादी तथा मिलिसिया समूहहरूलाई भर्त्सना गर्दै उनीहरू निष्क्रिय बन्नुपर्छ भन्नुहुन्छ ?’

ट्रम्पले सीधै निन्दा गरेनन् । एक श्वेत सर्वोच्चतावादी समूहलाई उनले भने, ‘प्राउड बोइज, पछि हट र तयार रहू ।’

त्यसपछि उनले तत्कालै ध्यान भड्काउन यस्तो टिप्पणी गरे, ‘तर म भन्छु, एन्टीफा र वामपन्थीहरूका बारेमा कसैले केही गर्नुपर्छ ।’

यसो भनेर ट्रम्पले प्रहरीको जातिवादी रवैयाको विरोध गरिरहेका प्रदर्शनकारीलाई आक्रमण गर्न दक्षिणपन्थी मिलिसियाहरूलाई अनुमति दिएजत्तिकै हो । वास्तविक पीडाका कारण प्रदर्शन गरिरहेकाहरूलाई उग्रवादी, हिंस्रक एन्टीफासँग जोडेर ट्रम्पले अतिशयोक्ति नै गरे । 

टीभी बहसपछि श्वेत सर्वोच्चतावादी समूहहरूले सामाजिक सञ्जालमा निकै खुशी मनाए । आफूहरूको मुद्दालाई संसारभरि फैलाएकोमा उनीहरू ट्रम्पप्रति कृतज्ञ रहे । 

उनले तिनीहरूलाई तयार रहन भनेर अमेरिकामा थप अशान्ति तथा हिंसाको वातावारण बन्ने संकेत दिएका छन् । ट्रम्पले हुलाकबाट आउने मतहरूबाट धोकाधडी र  धाँँधली हुने भनी लगातार बयान दिइरहेका छन् । 

अनि उनले पराजित भएमा पनि सजिलै सत्ता हस्तान्तरण नगर्ने बताएका छन् । यो सबैले परिस्थिति निकै खतरनाक बन्दै गएको देखाउँछ । अमेरिका गृहयुद्धको संघारमा पुगेको छ भन्ने संकेत यसले दिन्छ । 

ट्रम्पले उग्रदक्षिणपन्थी नवनाजी समूहहरूलाई अँगाल्नु आफैंमा आश्चर्यलाग्दो र असम्मानजनक काम हो किनकि विभिन्न अध्ययनहरूले देखाएअनुसार अमेरिकाको राष्ट्रिय सुरक्षाका लागि श्वेत सर्वोच्चतावादीहरू सबभन्दा खतरनाक जोखिम हुन् । 

ट्रम्पले उग्रवामपन्थी र कथित एन्टीफाविरुद्ध लगातार विषवमन गर्नुमा कुनै ठोस आधार छैन । अमेरिकामा अन्य कुनै पनि समूहभन्दा श्वेत सर्वोच्चतावादी सञ्जालहरूले गर्ने हत्याहिंसाको संख्या बढी छ । उनीहरूले हालैका महिनामा शान्तिपूर्ण जुलूसहरूलाई तारो बनाएका छन् । प्रहरीले काला जातिका पुरुष र महिलामाथि ज्यादती गरेको आरोप लगाउँदै शान्तिपूर्ण प्रदर्शन भइरहेकोमा श्वेत सर्वोच्चतावादीहरूले हिंसा मच्चाइरहेका छन् । 

तर ट्रम्पले वास्तविकतालाई पूरै उल्ट्याउँदै हिंसाका लागि वामपन्थी प्रदर्शनकारीहरू जिम्मेवार रहेको बताउँदै आएका छन् । 

बहसमा दुवै उम्मेदवारले एकअर्काविरुद्ध गालीगलौज गरेकाले हेर्नै नसकिने किसिमको थियो । तर डरलाग्दो कुरा भनेको अमेरिकाका ४५औं राष्ट्रपतिले श्वेत सर्वोच्चतावादी समूहहरूलाई कानून व्यवस्थाका हिमायती जस्तो गरी प्रस्तुत गरे । 

आगामी निर्वाचन मतगणनाको झमेलामा परेछ भने सशस्त्र हिंसाको सम्भावना प्रबल छ । मतगणनामा गडबडीको आशंका छ किनकि कोरोनाभाइरस महामारीका कारण ८ करोड भोट हुलाकबाट आउँदैछन् । 

राष्ट्रपतिले सडकमा आएर हिंसा मच्चाउन अतिवादीहरूलाई उक्साइरहेका छन् । उनले अज्ञानतावश वा अक्षमताका कारण यसो गरेका होलान् । तर यो खतरनाक छ र निन्दनीय पनि । 

स्पुतनिकन्युजमा प्रकाशित फिनियन कनिङघमको विश्लेषण

एजेन्सी
एजेन्सी

लेखकबाट थप...

कमेन्ट गर्नुहोस्