राजदूत र मुख्यसचिव नियुक्तिले नेकपामा फेरि किचलोको संकेत, प्रचण्डलगायतका नेता असन्तुष्ट !

स्थायी कमिटी बैठकले गरेको निर्णयविपरीत पार्टीसँग सल्लाह नगरी महत्त्वपूर्ण राजनीतिक नियुक्ति गरिएको भन्दै नेकपाभित्र विवाद शुरू भएको छ । सरकारले बिहीवार अमेरिका र बेलायतका लागि राजदूत नियुक्तिको सिफारिश गरेको थियो । 

सरकारका महत्त्वपूर्ण नियुक्तिबारे पार्टीमा सल्लाह गर्ने स्थायी कमिटी बैठकको निर्णय र सचिवालय बैठकमा भएको सहमतिविपरीत राजदूतहरू नियुक्त गरिएकोमा नेकपाका अध्यक्ष पुष्पकमल दाहाल प्रचण्ड पनि असन्तुष्ट बनेका छन् । नियुक्तिबारे कुनै परामर्श नगरिएको प्रचण्ड निकट स्रोतले बतायो । 


Advertisement

सरकारले गरेका पछिल्ला निर्णयलाई लिएर ओलीइतर खेमाका शीर्षस्थ नेताहरूबीच टेलिफोनमा कुराकानी भएको स्रोतको दाबी छ ।

‘पार्टी निर्णयलाई अध्यक्ष एवं प्रधानमन्त्री केपी शर्मा ओलीबाटै लत्याउने काम भयो, यसले सहमतिको वातावरण बिथोल्छ,’ प्रचण्ड निकट स्रोतले लोकान्तरसँग भन्यो । वरिष्ठ


Advertisement

नेता झलनाथ खनाल लगायत नेताहरू पनि पछिल्लो निर्णयप्रति असन्तुष्ट देखिएका छन् । ‘यो पार्टी निर्णयको सरासर उल्लघंन हो,’ खनाल निकट स्रोतले भन्यो । 

प्रधानमन्त्री निवास बालुवाटारमा बिहीवार बसेको मन्त्रिपरिषद् बैठकले निवर्तमान अर्थमन्त्री डा. युवराज खतिवडालाई अमेरिका र निवर्तमान मुख्यसचिव लोकदर्शन रेग्मीलाई बेलायतका लागि राजदूत सिफारिश गरेको थियो । सरकारले बिहीवार नै मुख्य सचिवमा शंकरदास बैरागीलाई नियुक्ति गरेको थियो । 

पार्टीमा देखिएको विवाद समाधानका लागि महासचिव विष्णु पौडेलको संयोजकत्वमा गठित कार्यदलले महत्त्वपूर्ण काम गर्दा पार्टीमा सल्लाह गर्ने सहितको प्रतिवेदन दिएको थियो ।

भदौ २६ गते बसेको स्थायी कमिटी बैठकले कार्यदलले तयार गरेको प्रतिवेदन पारित गरेको थियो । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्