५ नम्बर प्रदेशको राजधानी र नामकरणबारे मंगलवार प्रदेश सभामा मतदान हुँदैछ ।

प्रदेश सरकारले प्रस्ताव गरेको लुम्बिनी प्रदेशको सट्टा प्रदेशको नाम ‘थरुहट अवध मगरात’ राख्न संशोधन प्रस्ताव दर्ता भएको छ । 

जनता समाजवादी पार्टीका सांसद सहसराम यादव र पुरमति ढेंगा मगरले प्रदेशको नाम ‘थरुहट अवध मगरात’ राख्न प्रस्ताव गरेका हुन् । मतदानका लागि मध्याह्न १२ बजेका लागि बोलाइएको प्रदेश सभाको बैठक पौने १ बजेसम्म शुरू हुन सकेको छैन । 

सरकारले शुक्रवार प्रदेश सभामा प्रदेशको नाम लुम्बिनी र राजधानी दाङको देउखुरी राख्ने प्रस्ताव पेश गरेको थियो । प्रस्तावमाथि सोमवार प्रदेश सभामा सैद्धान्तिक छलफल सकेर संशोधनका लागि १८ घण्टाको समय दिइएको थियो ।

प्रदेशको राजधानी दाङ बनाउने प्रस्तावमा २ वटा र नाममा एउटा संशोधन प्रस्ताव दर्ता भएका छन् । नेपाली कांग्रेसकी सांसद पुष्पा थरुनीले बुटवललाई नै स्थायी राजधानी तोकियोस् भन्ने संशोधन प्रस्ताव दर्ता गरेकी छन् । 

कांग्रेसकै अर्का सांसद रमा अर्यालले प्रदेशको स्थायी राजधानी तोक्न वैकल्पिक प्रस्ताव दर्ता गराएकी छन् । उनले नवलपरासी, पाल्पा र कपिलवस्तु समेतलाई समेटेर राजधानी तोक्नुपर्ने प्रस्ताव गरेकी छन् । 

प्रदेशको राजधानी सार्ने विषयलाई लिएर सोमवार प्रदेश सभामा कांग्रेस सांसदले कुर्सी र माइक भाचेपछि तनाव भएको थियो ।