प्रदेशको राजधानीबारे मतदान गर्नुअघि ५ नम्बर प्रदेशको प्रदेशसभा बैठकमा मुख्यमन्त्री शंकर पोखरेल र प्रमुख प्रतिपक्षी दल नेपाली कांग्रेस संसदीय दलका नेता वीरेन्द्र कनोडियाले सम्बोधन गर्ने भएका छन् ।

प्रदेश सभाको दैनिक कार्यसूचीको शुरूमा विपक्षी दलका नेता वीरेन्द्र कनोडियाले सम्बोधन गर्ने कार्यसूची छ । त्यसपछि मुख्यमन्त्रीले सम्बोधन गर्नेछन् । 

मुख्यमन्त्रीको सम्बोधनपछि प्रदेशको नाम र राजधानीको प्रस्तावमा संशोधन दर्ता गरेका सांसदलाई बोल्नको लागि समय दिने कार्यक्रम छ । उनीहरू बोलेपछि प्रदेशको राजधानी दाङ राख्ने प्रस्तावलाई मतविभाजनको लागि निर्णयार्थ पेश गरिने प्रदेश सभाका सचिव दुर्लभकुमार पुनले जानकारी दिए । 

प्रदेशको नाम लुम्बिनी र राजधानी देउखुरी बनाउने प्रस्ताव शुक्रवार प्रदेश सभामा पेश भएको थियो ।