बुटवलस्थित कोरोना विशेष अस्पतालमा उपचाररत २ र लुम्बिनी प्रादेशिक अस्पतालमा १ गरी ३ कोरोना संक्रमितको मृत्यु भएको छ ।

बुटवल धागो कारखानास्थित बुटवल कोरोना विशेष अस्पतालमा उपचाररत पश्चिम नवलपरासीको सुनवल नगरपालिका–५ का ७६ वर्षीय पुरुष र बुटवल उपमहानगरपालिका–९ की ५५ वर्षीया महिलाको उपचारका क्रममा मृत्यु भएको हो । 

अस्पतालका सूचना अधिकारी डा. विष्णु गौतमले बुधवार बिहान जारी गरेको विज्ञप्तिमा संक्रमण पुष्टि भएपछि असोज १६ गते अस्पतालको सघन उपचार कक्षमा भर्ना गरिएका ७६ वर्षीय पुरुषको मंगलवार राति करीब १२ः५० बजे मृत्यु भएको जनाइएको छ  । उनमा सुख्खा खोकी, उच्च ज्वरो र उच्च रक्तचाप, मधुमेह, दमलगायत समस्या रहेको विज्ञप्तिमा जनाइएको छ ।

असोज १७ गते लुम्बिनी प्रादेशिक अस्पतालमा भर्ना भएकी कोरोना संक्रमित महिलाको बुधवार बिहान साढे ५ बजे मृत्यु भएको डा. गौतमले जानकारी दिए । ती महिलामा ज्वरो, सुख्खा खोकी, उच्च रक्तचाप र श्वासप्रश्वाससम्बन्धी समस्या थियो । 

दाङको राप्ती गाउँपालिका–८ की कोरोना संक्रमित ७१ वर्षीया महिलाको मंगलवार साँझ ६.३० बजे लुम्बिनी प्रादेशिक अस्पतालमा उपचारका क्रममा मृत्यु भएको सूचना अधिकारी डा. गौतमले बुधवार जारी गरेको विज्ञप्तिमा जनाइएको छ । ती महिलालाई असोज १७ गते कोरोना पुष्टि भएको र होम आइसोलेसनमा बसेका अवस्थामा ज्वरो र श्वासप्रश्वासमा समस्या आएपछि मंगलवार नै प्रादेशिक अस्पतालमा भर्ना गरिएकामा उपचारका क्रममा मृत्यु भएको बताइएको छ ।