विकसित देशहरूमा विगत एक वर्षमा चीनप्रति नकारात्मक धारणा बढेको एक नयाँ सर्वेक्षणले देखाएको छ । 

पिउ रिसर्च सेन्टरले गरेको सर्वेक्षणमा चीनले अमेरिकाको भन्दा राम्रोसँग कोभिड महामारी व्यवस्थापन गरेको पाइएको छ । 

सर्वेक्षण १४ वटा देशमा गरिएको हो । 

जुन १० देखि अगस्ट ३ सम्म गरिएको सर्वेक्षणमा सर्वेक्षण गरिएका सबै देशमा बहुसंख्यक जनताले चीनप्रति नकारात्मक धारणा राखेको पाइयो । 

कुल १४ हजार २७६ जना वयस्कलाई टेलिफोनबाट सर्वेक्षण गरिएको थियो ।

कोभिड–१९ को पृष्ठभूमिमा सर्वेक्षणको यस्तो परिणाम आएको हो । महामारी बन्नुअघि यो रोग चीनमा पहिलोपटक देखिएको थियो । 

अनि अमेरिकाका राष्ट्रपति डोनल्ड ट्रम्पले नोेभेम्बर ३ मा हुने निर्वाचन पुनः जित्नका लागि चीनको कठोर आलोचना गरिरहेकाले पनि मानिसहरूको धारणालाई प्रभावित पारेको देखिन्छ । 
 

पिउको प्रतिवेदनमा सर्वेक्षण गरिएका मुलुकहरूमा ६१ प्रतिशतले महामारी व्यवस्थापनमा चीनले राम्रो काम नगरेको बताए भने ३७ प्रतिशतले राम्रो काम गरेको धारणा राखे । 

अमेरिकाले गरेको कोरोना व्यवस्थापनको चीनको भन्दा बढी खराब रहेको सर्वेक्षणले देखाएको छ । ८४ प्रतिशत व्यक्तिले अमेरिकाको व्यवस्थापनप्रति नकारात्मक धारणा राखे । 

चीनका राष्ट्रपति सी चिनफिङमा मानिसको विश्वासका सम्बन्धमा पनि यही कुरा लागू भयो । १४ देशमा औसत ७८ प्रतिशत व्यक्तिहरूले विश्व मामिलामा सीले सही काम गर्नेछन् भन्नेमा खासै विश्वास नगरेको पाइयो । 

चीनले कोरोना व्यवस्थापन राम्रो गरेको भनी प्रतिक्रिया जनाउनेहरूमध्ये पनि १० मा चारले मात्र सीलाई विश्वास गर्ने बताए । 

तर सीको उदयका सम्बन्धमा चिन्ता व्यक्त भइरहेपनि सर्वेक्षणमा धेरै मानिसले ट्रम्पभन्दा सीमै विश्वास गरेको बताए । जर्मनीमा ७८ प्रतिशतले सीमा विश्वास नरहेको बताउँदा ८९ प्रतिशतले ट्रम्पमाथि विश्वास नगर्ने बताए ।