अमेरिकामा नोभेम्बर ३ मा राष्ट्रपति निर्वाचन हुँदैछ ।

अहिलेसम्मका सबै सर्वेक्षणमा बहालवाला राष्ट्रपति डोनल्ड ट्रम्प पछि परिरहेको देखिन्छ । अधिकांश सर्वेक्षणले जो बाइडनले आगामी राष्ट्रपति बन्ने प्रक्षेपण गरिरहेका छन् । 

तर ट्रम्पका लागि यो कुनै नयाँ कुरा छैन । सन् २०१६ मा राष्ट्रपति निर्वाचनमा पनि यही तस्वीर थियो । कसैले पनि रिपब्लिकन पार्टीका उम्मेदवार ट्रम्प विजयी हुन्छन् भनेका थिएनन् । 

लगभग सबै सर्वेक्षणमा हिलारी क्लिन्टन अघि रहने प्रक्षेपण गरिरहेका थिए । तर अन्त्यमा हिलारी हारिन् । 

सन् २०१६ को अमेरिकी चुनावमा ट्रम्पको चुनाव चमत्कारभन्दा कम थिएन । जनताले दिएको मत अर्थात् पपुलर भोटमा उनी हिलारीसँग हारेका हुन् । तर इलेक्टोरल कलेजको मत पाएर उनी विजयी भए । 

त्यतिखेर ट्रम्पले ४६.४ प्रतिशत मत पाएका थिए भने क्mिन्टनले ४८.५ प्रतिशत मत पाएकी थिइन् । 

तर ५३८ इलेक्टोरल मतमा ट्रम्पले ३०६ र क्लिन्टनले २३२ मत पाएका थिए । 

अमेरिकी संविधानमुताबिक प्रत्येक राज्यको जनसंख्याको हिसाबमा इलेक्टरको संख्या निर्धारित हुन्छ । अमेरिकी जनताले सीधै राष्ट्रपति उम्मेदवारलाई भोट नदिएर प्रतिनिधिहरूलाई भोट दिन्छन् । नोभेम्बर ३ मा हुने यस भोटिङपछि डिसेम्बर महिनामा अमेरिकी संसद् राष्ट्रपति छानिनेछन् ।

त्यतिखेर इलेक्टरले आफ्नो पार्टीभन्दा बाहेकको अर्को उम्मेदवारलाई समेत भोट दिन सक्छ । डेमोक्रेटिक पार्टीको इलेक्टरले रिपब्लिकन पार्टीको राष्ट्रपति उम्मेदवारलाई मत दिन पाउँछ । 

क्यालिफोर्निया र टेक्सासमा सबभन्दा धेरै इलेक्टरहरू छन् । 

अमेरिकी चुनावमा पपुलर भोटभन्दा बढी स्विङ राज्यहरूको महत्त्व छ । ती स्विङ राज्यमा इलेक्टरहरूको संख्या बढी छ । 

ट्रम्प अहिले रेटिङ र पोलमा पछि परेको भए पनि इलेक्टोरल भोट प्रणालीमा विश्वास गरिरहेका छन् ।