हिन्दुस्तान टाइम्सले सोमवार एक सम्पादकीय प्रकाशन गर्‍यो जसको शीर्षक छ ः ‘चीनलाई स्मरण होस् ः भारत स्वतन्त्र छ’ । सम्पादकीयले ताइवान टापुको ‘राष्ट्रिय दिवस’ मनाउने केही भारतीय सञ्चारमाध्यमको कामलाई जायज ठहर्‍याउन खोजेको छ । 

‘भारत गर्विलो लोकतन्त्र हो । यहाँ स्वतन्त्र र जीवन्त मिडिया छ,’ सम्पादकीयमा लेखिएको छ । यसले चीनको सल्लाहलाई कथित प्रभुत्व र मिडियाको दमनसँग जोडेको छ । 

हिन्दुस्तान टाइम्सको सम्पादकीयले एक आधारभूत तथ्यलाई बेवास्ता गरेको छ ः चीनको सार्वभौमसत्ताको सवालमा भारत स्वतन्त्र छैन । चीनले अन्य मुलुकलाई यो आधाररेखा तोड्न दिँदैन र लोकतन्त्र वा स्वतन्त्रसँग यसको कुनै साइनो छैन । 

भारतले एक चीन नीति स्वीकार गरेको छ र चीन–भारत कूटनीतिक सम्बन्धको यो नै आधार हो । भारतका केही मिडियाहरूले ताइवानको ‘राष्ट्रिय दिवस’ मनाएर एक चीन नीतिलाई धज्जी उडाएका छन् र चिनियाँ दूतावासले उनीहरूलाई यस विषयमा कुरा राख्दा उनीहरूले गलत अडानलाई सच्याउन पनि चाहेनन् । 

चीन–भारत सीमा तनावको पृष्ठभूमिमा भारतका केही सञ्चारमाध्यमहरू ताइवानको प्रश्न उठाइरहेका छन् । सेप्टेम्बर महिनामा न्युज लाइन आईएफईले चिनियाँ जनमुक्ति सेनाको सु–३५ लडाकू विमान ताइवानले खसाएको भनी झूटो समाचार प्रकाशन गर्‍यो जसको तत्कालै खण्डन गरियो । 

भारतीय सञ्चारमाध्यमहरूले ताइवानका पृथक्तावादी शक्तिलाई सबल बनाइरहेका छन् अनि केही भारतीय सम्भ्रान्तहरू ताइवानको प्रश्नमा छलछाम गरिरहेका छन् । उनीहरू एकपक्षीय रूपमा चीन–भारत सम्बन्धलाई विषाक्त बनाइरहेका छन् ।

कुनै पनि सरकारले अन्य मुलुकलाई आफ्नो सार्वभौमसत्ताका विषयमा विवाद उत्पन्न गर्न दिँदैन । चीनको सञ्चारमाध्यमले पूर्वोत्तर भारतमा पृथक्तावादी शक्तिहरूलाई खुला समर्थन गरेमा वा भारतका विभिन्न पृथक्तावादी शक्तिहरूको अनुकूल हुने सामग्री प्रकाशन गरेमा नयाँ दिल्लीको प्रतिक्रिया कस्तो होला ? चीनको भन्दा नरम प्रतिक्रिया भारतले दिने छैन । अन्य मुलुकको सार्वभौमसत्तामाथि प्रश्न उठाउने आवाजको विरोध गर्नुपर्दैन ?

भारतका केही सञ्चारमाध्यमलाई एक चीन नीतिमा प्रश्न उठाउने स्वतन्त्रता छैन । भारत आफूलाई ‘गर्विलो लोकतन्त्र’ भन्छ र चीनलाई पश्चिमी मुलुकहरूको दृष्टिकोणले हेर्छ । 

चीन र अमेरिकाबीचको तनाव चर्किरहँदा वाशिङटनले ताइवान कार्ड खेल्न थालेको छ । भारतका केही मानिस वाशिङटनको कदमको अनुसरण गर्न थालेका छन् र यसबाट फाइदा उठाउन खोज्दैछन् । 

आफूले अमेरिका र अन्य पश्चिमी मुलुकको समर्थन हासिल गरेको विश्वास नयाँ दिल्लीले लिएको छ । त्यसैले ऊ चीनविरुद्ध उत्तेजक गतिविधि बढाउन थालेको छ र चीनको आधार रेखालाई चुनौती दिन खोज्दैछ । 

तर अमेरिकाको समर्थन भरपर्दो छैन भने चीनको प्रत्याक्रमण कठोर हुन्छ । भारत अहिले आगोसँग खेलिरहेको छ र ऊ दुवैतर्फबाट निराश हुने मात्र सम्भावना छ ।