द रोयल स्विडिश एकेडमी अफ सायन्सेजले सोमवार अमेरिकी अर्थशास्त्रीहरू पल मिलग्रोम र बब विल्सनलाई अर्थशास्त्रका लागि नोबेल पुरस्कार दिने घोषणा गर्दा उनीहरू दुवैजना क्यालिफोर्नियाको स्ट्यानफोर्डमा रहेको आफ्नो घरमा मस्त सुतिरहेका थिए । 

पछि कमिटीले विल्सनलाई पुरस्कार जितेको खबर दियो । तर मिलग्रोम सुतिरहेका थिए र उनलाई कसैले पनि सम्पर्क गर्न सकेन । 

त्यसैले विल्सन आफ्ना छिमेकी तथा पूर्वशिष्य मिलग्रोमको घर गए अनि खुशीको खबर सुनाए । 
 

मिलग्रोमको घरको सीसीटीभी क्यामराले विल्सन मध्यरातमा खबर दिन आएको देखाउँछ । विल्सन र उनकी पत्नी मेरी ढोकामा पुग्छन् अनि मेरीले हातमा फोन समातेकी हुन्छिन् । 
‘

पल,’ विल्सनले इन्टरकम बजाउँदै बोलाउँछन् र ढोकामा धेरैपटक ढकढकाउँछन् ।

निकै पछि मिलग्रोम बोल्छन्, ‘हजुर ।’

‘पल, म बब विल्सन । तिमीले नोबेल पुरस्कार जित्यौ,’ उनी नियन्त्रणका साथ भन्छन् । ‘तिनीहरू तिमीसँग बोल्न खोजिरहेका छन् । तर पाइरहेका छैनन् । तिम्रो नम्बर उनीहरूसँग रहेनछ ।’

मेरी बीचैमा बोल्छिन्, ‘हामीले तिनीहरूलाई तिम्रो मोबाइल नम्बर दियौं ।’

‘ए, मैले जितें ? गजब,’ मिलग्रोम भन्छन् । ‘ठीक छ ।’

‘तिमी फोनमा बोल न त,’ मेरी यसो भन्दै हाँस्छिन् ।

त्यसको केही मिनेटअघि विल्सन आफैं पनि समाचार सुनेर छक्क परेका थिए । उनको घरमा फोन बज्दा उनले त्यसलाई झिकेर राखे । त्यसपछि नोबेल कमिटीले मेरीलाई फोन गरेको थियो । 
 

मिलग्रोमले पछि आफ्नो दृष्टिकोणबाट घटनाको बारेमा बताए । 
‘

म मस्त निद्रामा थिएँ र बिहान २ बजे ढोका घन्टी बज्यो । अनि मैले फोन उठाएँ । त्यो भिडियो डोरबेल थियो । मैले बबको अनुहार देखें । उनी ढोका ढकढकाइरहेका थिए र मैले नोबल पुरस्कार जितें भनी बताइरहेका थिए ।

यो गजबको समाचार हो,’ उनले रोयटर्स समाचार संस्थालाई बताए । 
 

स्ट्यानफोर्ड विश्वविद्यालयका यी प्राज्ञहरूले लिलामी सिद्धान्तमा काम गरेकोमा नोबेल पुरस्कार पाएका हुन् । मिलग्रोम सन् १९७० को दशकमा विल्सनका विद्यार्थी थिए र उनीहरूले त्यसपछि मिलेर काम गर्ने गरेका छन् ।

नोबल पुरस्कार जित्ने मिलग्रोम विल्सनका तेस्रा विद्यार्थी हुन् ।