कर्णालीमा देखिएको विवाद समाधानका निम्ति भन्दै छलफलमा जुटेका सत्तारूढ दल नेपाल कम्युनिस्ट पार्टी (नेकपा) अध्यक्षद्वय केपी शर्मा ओली र पुष्पकमल दाहाल 'प्रचण्ड'ले कुनै निष्कर्ष दिन सकेका छैनन् ।

आइतवार दुवै अध्यक्षको प्रधानमन्त्रीनिवास बालुवाटारमा भेटघाट भएको थियो । ओलीसँग कुरा गर्न प्रचण्ड सवा ४ बजे बालुवाटार पुगेका थिए । आइतवारको भेटघाटले छलफललाई निरन्तरता दिने निष्कर्ष मात्र निकालेको स्रोतहरूले दाबी गरेका छन् ।

मन्त्रिमण्डल पुनर्गठनमा ओलीसँग असन्तुष्ट देखिएका अध्यक्ष प्रचण्ड र ओलीबीच केहीदिन यता संवादहीनताको स्थिति पैदा भएको थियो । त्यो संवादहीनता आज तोडिएको हो ।

एक साता अघि कर्णाली प्रदेशका मुख्यमन्त्री महेन्द्रबहादुर शाहीविरुद्ध 'छापामार' शैलीमा अविश्वास प्रस्ताव दर्ता गरिएपछि उत्पन्न राजनीतिक हलचल अझै साम्य भएको छैन ।

नेकपा कर्णाली प्रदेशका सहइन्चार्जसमेत रहेका प्रदेश सांसद यामलाल कँडेलको नेतृत्वमा १८ सांसदहरूले मुख्यमन्त्री शाहीविरुद्ध हस्ताक्षरसहित अविश्वासको प्रस्ताव दर्ता गरेका थिए ।

त्यसपछि उत्पन्न परिस्थितिका बारेमा जानकारी लिन भनेर अध्यक्षद्वय केपी शर्मा ओली र पुष्पकमल दाहाल 'प्रचण्ड'ले मुख्यमन्त्री शाही, कँडेल, सचेतकबाट हटाइएका गुलाबजंग शाह, चन्द्रबहादुर शाही लगायतका नेताहरूलाई काठमाडौँ बोलाए । उनीहरू काठमाडौँ आएको पनि ४/५ दिन भइसक्यो ।

यसबीचमा उनीहरूलाई अध्यक्ष प्रचण्डले दुई समूहमा बिहीवार र शुक्रवार भेट दिएका थिए भने शनिवार प्रधानमन्त्रीनिवास बालुवाटारमा संयुक्त रूपमा ओलीसँग बैठक बस्यो ।

कर्णालीबाट आएका नेताहरूलाई दुवै अध्यक्षले छुट्टाछुट्टै भेट गरेर परिस्थितिको जायजा लिए । तर विवाद समाधानको ठोस विषयवस्तुबारे कुनै सहमति भएको छैन ।

शनिवार बालुवाटारमा अध्यक्ष प्रचण्डलाई पनि बोलाइएको तर उनले बालुवाटार जान अनिच्छा देखाएका थिए । ओलीले दुई अध्यक्षबीच छलफल र कुराकानी गरेपछि विवाद समाधान हुने भन्दै नेताहरूलाई आश्वस्त पारे ।

'अध्यक्ष ओलीले तपाईंहरू अहिले नजानुस, विवाद समाधान भएपछि जानुहोला भनेर भन्नुभयो,' चन्द्रबहादुर शाहीले लोकान्तरसँग भने, 'अहिले हामी काठमाडौँ नै छौं । केही न केही लिएर जान्छौं ।'