अघिल्लो साता उत्तर कोरियाले संसारसामु अत्याधुनिक हातहतियार प्रदर्शन गर्‍यो । 

उसले परम्परागत हतियारका साथै रणनीतिक हतियारहरूको पनि प्रदर्शन गरेको थियो । तिनमा दुईवटा ब्यालिस्टिक क्षेप्यास्त्रहरू उल्लेख्य थिए । 

एउटा क्षेप्यास्त्र ठोस इन्धन भएको डिजाइनमा आधारित पनडुब्बीबाट प्रक्षेपण गरिने ब्यालिस्टिक क्षेप्यास्त्र थियो भने अर्को चाहिँ अतिविशाल, जमीनबाट मार हान्ने, तरल इन्धन भएको अन्तर्महादेशीय ब्यालिस्टक क्षेप्यास्त्र थियो । 

दोस्रो क्षेप्यास्त्र अहिलेसम्म बनेकैमध्ये सबभन्दा विशाल देखिन्थ्यो र किम जोङ उनले गत जनवरी महिनामा सार्वजनिक गर्ने भनी घोषणा गरेको क्षेप्यास्त्र शायद यही हो । 

यसरी अत्याधुनिक हतियार देखाएर उत्तर कोरियाले आफू हतियारमा विकासमा दत्तचित्त भएर लागिपरेको सन्देश दिन खोजेको छ । तर वाशिङटन आक्रोशित हुने गरी उसले लामो दूरीको क्षेप्यास्त्र र आणविक बमहरूको परीक्षण चाहिँ गरेको छैन । 

‘उत्तर कोरियालाई कम आँक्ने भूल गर्नुहुँदैन । उनीहरू आफ्नो प्रतिरक्षात्मक क्षमतालाई बढाउने काम गरिरहेका छन्,’ वान अर्थ फ्युचर फाउन्डेसनमा क्षेप्यास्त्रविद् मेलिसा हानहामले बताइन् । ‘उनीहरूलाई छुट दिइरहेसम्म आणविक क्षेप्यास्त्र कार्यक्रम विकास गरिरहने छन् ।’

एक अमेरिकी अधिकारीले यसरी नयाँ अन्तर्महादेशीय क्षेप्यास्त्र प्रदर्शन गर्ने उत्तर कोरियाको निर्णय निराशाजनक भएको बताए । तर परेडमा हतियार देखाउनु सबभन्दा कम उत्तेजक गतिविधि हो । 

लामो दूरीको ब्यालिस्टिक क्षेप्यास्त्र परीक्षण गर्दा अमेरिकाका राष्ट्रपति डोनल्ड ट्रम्पबाट कठोर प्रतिक्रिया आउन सक्ने सम्भावना रहन्थ्यो । 

बुधवार क्षेप्यास्त्रहरूका बारेमा सोध्दा अमेरिकाका परराष्ट्रमन्त्री माइक पोम्पेओले परेडमा हतियार देखाउनु त्यसको योग्यताको प्रदर्शन नभएको बताए । अनि ट्रम्पसँगको भेटपछि किमले लामो दूरीको एउटा पनि ब्यालिस्टिक क्षेप्यास्त्र परीक्षण नगरेको उनको भनाइ छ ।
 

सीएनएनबाट