भारतको मध्य प्रदेशका मुख्यमन्त्री शिवराज सिंह चौहान राजधानी भोपालमा सोमवार दुई घन्टाका लागि मौन धर्नामा बसेका छन् । 

पूर्व मुख्यमन्त्री कमलनाथले भारतीय जनता पार्टीकी सदस्य तथा मन्त्री इमारती देवीका विरुद्ध भद्दा टिप्पणी गरेको विरोधमा उनी धर्नामा बसेका हुन् । 
 

ग्वालियरमा एक सभामा भाषण गर्ने क्रममा कमलनाथले इमारती देवीलाई आइटम (फिल्मको गीतमा नाच्ने महिला) भनेका थिए । 

कांग्रेस छोडेर भाजपामा आएका नेता ज्योतिरादित्य सिन्धियाले पनि कमलनाथको आलोचना गर्दै कांग्रेस पार्टीमा महिलाविरुद्ध अश्लील टिप्पणी गर्ने इतिहास रहेको बताए । 

उनले भने, ‘कांग्रेसको सिद्धान्त नै यही हो । दिग्विजय सिंहले कांग्रेस नेत्री मीनाक्षी नटराजनविरुद्ध भद्दा टिप्पणी गरेका थिए जुन मलाई अहिले याद आएन । अहिले कमलनाथले इमारती देवीलाई आइटम भने अनि अजय सिंहले जलेबी भने । कांग्रेसले महिलालाई कहिल्यै सम्मान गर्दैन ।’

धर्नामा बस्नुअघि शिवराज सिंह चौहानले भने, ‘यो इमारती देवीप्रतिको अपमान मात्र नभई मध्य प्रदेशका छोरी बहिनीहरूको अपमान हो । कांग्रेसमा लामो समय सेवा गरेकी छोरीका लागि कमलनाथले अपशब्द प्रयोग गरे ।

यस देशमा द्रौपदीको अपमान हुँदा महाभारतको युद्ध भएको थियो । मानिसले यो सहँदैनन् । उनलाई धिक्कार छ,’ चौहानले भने । 
 

कमलनाथको विवादास्पद भनाइमा प्रतिक्रिया जनाउँदै इमारती देवीले सोनिया गान्धीसमक्ष कमलनाथ पार्टीबाट हटाउन माग गरिन् । आफ्नी छोरीका विषयमा यस्तो टिप्पणी आएको भए सोनियाले सहन्थिन् भनेर समेत इमारतीले प्रश्न गरिन् ।