कोरोना संक्रमण भएका ३ सय ४५ जनाको अस्था जटिल रहेको स्वास्थ्य तथा जनसंख्या मन्त्रालयले जनाएको छ ।

त्यसमध्ये ६३ जना भेन्टिलेटर र २ सय ८२ जना आईसीयूमा उपचाररत छन् ।

सबैभन्दा बढी बाग्मती प्रदेशमा आईसीयूमा १ सय ५३ र भेन्टिलेटरमा ३८ जना उपचाररत छन् ।

पछिल्लो २४ घण्टामा देशभरमा ३ हजार ७ सय ९० जना संक्रमित थपिएका छन् । संक्रमितको कुल संख्या १ लाख ३६ हजार ३६ पुगेको पत्रकार सम्मेलनमा जानकारी दिइएको छ ।

सक्रिय संक्रमितको संख्या भने ४० हजार नाघेको छ । मन्त्रालयका अनुसार ४० हजार ७ सय ७८ जना सक्रिय संक्रमित छन् ।

पछिल्लो २४ घण्टामा २ हजार ३ सय ३५ जना निको भएर डिस्चार्ज भएका छन् ।

डिस्चार्ज हुनेको कुल संख्या ९४ हजार ५ सय १ पुगेको छ ।

मन्त्रालयका अनुसार मृतकको संख्या भने ७ सय ५७ पुगेको छ । पछिल्लो २४ घण्टामा थप १८ जनाको मृत्यु भएको मन्त्रालयले जनाएको छ ।