अजरबैजानविरुद्धको युद्धमा आर्मेनियाका तर्फबाट मर्ने सैनिकहरूको संख्या बढिरहेको छ । 

सोमवार आर्मेनियाको सेनाले यस सूचीमा थप १९ सैनिकको नाम जोडेको छ । यससँगै मृत सैनिकको संख्या ७२९ पुगेको छ । 
 

अजरबैजानले चाहिँ आफ्नो धनजनको क्षतिसम्बन्धी कुनै पनि विवरण सार्वजनिक गरेको छैन । 

राष्ट्रपति इल्हाम एलियेभले युद्ध सकिएपछि मात्र यो जानकारी सार्वजनिक गरिने बताएका छन् । 
 

अजरबैजानको महान्यायाधिवक्ताको कार्यालयले अगदाम इलाकामा गोलीकाण्डका कारण चारजना घाइते भएको जानकारी दिएको छ । 

यसैबीच इरानले काराबाखका तर्फबाट इरानको भूमिमा मिसाइल वा तोप आइपुगेमा जवाफ फर्काउने बताएको छ । 

अघिल्लो साता मल्टीपल लोन्च रकेट सिस्टमबाट कम्तीमा आठ क्षेप्यास्त्र प्रहार गरिएको र तिनीहरू अराकेज नदीको किनारमा इरानी क्षेत्र अफारिनमा खसेको समाचार आएका थिए । त्यसमा कोही पनि हताहत भएको थिएन । 

शनिवार अजेरी सेनाले यसै नदीको अर्को किनारमा झण्डा गाडेको थियो । 
 

अजरबैजान र आर्मेनियासँग जोडिएका इरानी इलाकामा अजेरी मूलका मानिस बस्ने गर्छन् । 
 

अजरबैजानका राष्ट्रपति अलीयेभले दक्षिणी जेबरैल जिल्लाका थप १३ गाउँमा आफ्नो सेनाले कब्जा गरेको दाबी गरेका छन् । 

सेनाले अराकेज नदीमा बनेको खुदाफारिक पुलमा झण्डा गाडेको उनले बताए । त्यो ठाउँ सन् १९९० को दशकदेखि आर्मेनियाको कब्जामा रहेको थियो । 
 

टेलीग्राम यापमा आएका भिडियोहरूमा खुदाफारिन पुल नजिक इरानमा बस्ने अजेरीहरूले सैनिकको स्वागत गरेको देखिन्छ ।