भारतीय सेनाले चिनियाँ जनमुक्ति सेनाका सैनिक कर्पोरल वाङ या लाङ चीनलाई नै सुम्पेको छ । 

चुशूल–मोल्दो मीटिङ पोइन्टमा मंगलवार अबेर राति चिनियाँ सैनिक फर्काइएको हो । 

लद्दाखको डेमचोकमा भूलवश आइपुगेका वाङलाई भारतीय सेनाले हिरासतमा लिएको थियो । 

हिरासतमा लिइएका वाङलाई अक्सिजन, खाना र न्यानो कपडा उपलब्ध गराएको थियो । 

भारतले ती सैनिक जासूसीका लागि आएका हुन् कि भनी आशंका गरेको थियो तर चिनियाँ जनमुक्ति सेनाले वाङ सैनिक गोठालालाई याक खोज्न सहायता गर्ने क्रममा हराएको र भारतीय क्षेत्रमा पुगेको दाबी गरेको थियो । 

अन्तर्राष्ट्रिय नियम र प्रचलित परम्परालाई सम्मान गर्दै भारतले तत्कालै चिनियाँ सैनिक फर्काएको थियो । 

अन्तर्राष्ट्रिय नियममुताबिक, शान्तिकालमा कुनै पनि देशको सैनिक अर्को देशमा पक्राउ परेमा उसको तलाशी लिइन्छ । त्यसपछि उसको पहिचान पत्ता लगाइन्छ । अनि ऊ पक्राउ परेको खबर अर्को मुलुकलाई दिइन्छ । पूर्ण रूपमा सन्तुष्ट भएपछि सैनिकलाई उसको देशसमक्ष सुम्पिइन्छ ।