अमेरिकाका राष्ट्रपति डोनल्ड ट्रम्पले वाशिङटन डीसीमा रहेको आफ्नै होटलमा चुनावको राति पार्टी गर्ने योजना बनाएका छन् । 

विगत केही दिनदेखि ट्रम्पको चुनाव अभियानले उनको नाममा इमेल पठाउँदै चन्दादाताहरूलाई चुनावको राति पार्टीमा आउनका लागि भनिरहेको छ । 

चुनाव परिणामको प्रतीक्षा उनले आफ्नो विलासी होटलमा बसेर गर्ने संकेत यसबाट पाइएको छ । उनका छोरा ट्रम्प जुनियरले पनि चन्दादाताहरूका लागि पार्टी दिने योजना बनाइरहेका छन् । 

चुनावका लागि चन्दा उठाउने क्रममा ट्रम्पले भने, ‘नोभेम्बर ३ को राति ऐतिहासिक हुनेछ किनकि हामीले थप चार वर्षका लागि जित्नेछौं । यो निकै भव्य हुनेछ र तपाईं त्यहाँ हुनुभयो भने झनै राम्रो हुन्छ ।’

रियालिटी टीभीका स्टार तथा न्युयोर्कका घरजग्गा व्यवसायीको पहिचानलाई भजाएर देशको राष्ट्रपति बनेका ट्रम्पले चुनावको राति आफ्नै होटलमा पार्टी गर्नु आफैंमा प्रतीकात्मक छ । 

ट्रम्पको वाशिङटन होटल ह्वाइट हाउसभन्दा केही ब्लक मात्र पर छ । निर्वाचनको दिनका लागि उक्त होटल हप्तौंअघि नै बूकिङ भइसकेको छ । सामान्य कोठामा बस्न पनि एक रातको १२ सय डलर तिर्नुपर्ने हुन्छ ।