डोटी जिल्लाको पूर्वीचौंकी गाउँपालिकाका ९ वटै वडामा राष्ट्रिय प्रसारणको विद्युत सेवा पुगेसँगै अर्को स्थानीय तह आदर्श गाउँपालिकाले पनि आफ्ना सबै वडामा विद्युत सेवा विस्तार गर्न थालेको छ ।

डोटीका स्थानीय तहबीच आफ्ना वडामा विद्युत् सेवा विस्तारका लागि होडबाजी नै चल्न थालेको छ ।

जनप्रतिनिधीको पहलमा जिल्लाका ९ स्थानीय तहमध्ये जोरायल, बडिकेदार, बोगटानफुड्सिल, सायल, पूर्वीचाँकी, केआइसिंह तथा आदर्श गाउँपालिकामा तीब्र रूपमा विद्युत् विस्तारको काम भइरहेको डोटी साना जलविद्युत् कार्यालयले जनाएको छ ।

जिल्लाको आदर्श गाउँपालिका–५ लामिखालमा पोल गाढेको ५ वर्षपछि विद्युत् सेवा पुगेको छ । करीब ४०० घरधुरीले विद्युत् सेवा पाएका छन् । दशैंको अवसर पारेर गाउँमा विद्युत् सेवा विस्तार गरिएपछि गाउँले खुशी भएका हुन् । पोलगाडेको वर्षौंपछि गाउँपालिकाको विशेष पहलमा अहिले आएर राष्ट्रिय प्रसारणलाइनको विद्युत बिस्तार गरिएको भन्दै स्थानीयबासीमा खुसियाली छाएको स्थानीय रमेशबहादुर साउँदले जानकारी दिए ।

विद्युत् नहुँदा सल्लाको दियालो तथा टुकीका भरमा उज्यालो गर्दै आएका नागरिक गाउँमा विद्युत विस्तार भएपछि निकै खुशी भएको स्थानीय धनबहादुर नेपालीले बताए ।

नेपाल विद्युत् प्राधिकरणको केन्द्रीय लाईन प्राधिकरण र आदर्श गाउँपालिकाको संयुक्त सहकार्यमा वडाको केन्द्र लामीखालमा पहिलो पटक विद्युत विस्तार गरिएको गाउँपालिका अध्यक्ष टेकबहादुर रोकायाले बताए । उनले भने, ‘बिजुलीले त्यहाँका नागरिकले उज्यालो पाएका छन् ।’ गाउँपालिकाले आर्थिक वर्ष २०७६/०७७ मा विद्युत् विस्तारका लागि बजेट विनियोजन गरिएपछि अहिले विद्युत् विस्तारको काम अघि बढेको गाउँपालिका अध्यक्ष रोकायाले जानकारी दिए ।

जिल्लाका अधिकांश स्थानीय तह तथा गाँउपालिकाका प्रत्येक घरमा चालू आर्थिक वर्षको अन्तिमसम्म बिजुली बाल्ने विद्युत कार्यालय र स्थानीय तहले संयुक्त योजना बनाइएर सोही अनुसार पत्राचार गरेकाले काम अघि बढाइरहेको डोटी साना जलविद्युत् कार्यालय दिपायलका प्रमुख कपिलदेव जोशीले जानकारी दिए ।