नेपाल कम्युनिस्ट पार्टी (नेकपा)का केन्द्रीय सदस्य डा. विजय पौडेलले पार्टीमा प्रस्तुत हुने हरेक प्रस्ताव छलफलका लागि योग्य हुने दावी गरेका छन् ।

छलफलले साझा समाधान निकाल्न नसके लोकतान्त्रिक विधिबाट निकालिने निष्कर्ष सबैले मान्नुपर्ने उनको जिकीर छ ।

कार्यकारी अध्यक्ष पुष्पकमल दाहाल 'प्रचण्ड'ले अर्का अध्यक्ष एवं प्रधानमन्त्री केपी शर्मा ओलीलाई लेखेको पत्र फिर्ताका लागि ओली पक्षले दबाब दिइरहेको समयमा छलफलबाट भाग्न खोज्नु कम्युनिस्ट चरित्र नभएको उनको भनाइ छ ।

‘पार्टीमा प्रस्तुत हुने हरेक प्रस्ताव छलफलका लागि योग्य हुन्छन् । जो छलफलबाट भाग्छ, उ कम्युनिष्ट त के सामान्य पूँजीवादी पार्टीको सदस्य हुन पनि अयोग्य छ भनेर बुझ्न जरुरी छ । छलफल गरी सके साझा समाधान निकाल्नु, नभए लोकतान्त्रिक विधिबाट निकालिने निष्कर्ष सबैले मान्नुपर्दछ,’ पौडेलले आइतवार ट्वीटरमा सन्देश लेख्दै भनेका छन् ।

नेकपा स्थायी कमिटी बैठकले निकास निकाल्न नसक्दा पौडेल लगायतले केन्द्रीय समिति बैठक बोलाउन माग गर्दै पार्टी कार्यालयमा धर्ना र हस्ताक्षर संकलन अभियानको नेतृत्व गरेका थिए ।