राप्रपा अध्यक्ष कमल थापाले पार्टी एकताको नाममा राप्रपाको लोकप्रिय चुनाव चिह्न गाई गुमाउनु पर्दाको पीडा फेरि एकपटक वोध भएको बताएका छन् । आज गाई पूजा गर्दा भावविह्वल भएको उनले बताएका हुन् ।

सामाजिक सञ्जाल ट्वीटरमा गाईपूजाको फोटो राख्दै थापाले हिन्दुराष्ट्रको एजेण्डा बोकेको पार्टीको लागि गाई चिह्न ठीक हुन्छ भनेर पशुपतिशमशेर जबरा र प्रकाशचन्द्र लोहनीलाई सहमत गराउन नसक्नु आफ्नै कमजोरी रहेको बताएका हुन् ।

‘आज गाई पुजा गर्दा भाव विह्वल भएँ । पार्टी एकताको नाममा राप्रपाको लोकप्रिय र सर्वाधिक उपयुक्त चुनाव चिह्न गाई गुमाउनु पर्दाको पीडा फेरि एकपटक बोध भयो । हिन्दुराष्ट्रको एजेण्डा बोकेको पार्टीका लागि 'गाई' चिह्न ठीक हुन्छ भनेर पशुपतिजी र प्रकाशजीलाई सहमत गराउन नसक्नु मेरै कमजोरी हो,’ थापाले लेखेका छन् ।

दुई दलले पार्टी एकता गर्दा चुनाव चिह्न हलोमा सहमति गरेका थिए ।