सत्तारूढ दल नेपाल कम्युनिस्ट पार्टी (नेकपा)भित्र चुलिएको संकटका बीच प्रधानमन्त्रीसमेत रहेका पार्टी अध्यक्ष केपी शर्मा ओलीले वरीष्ठ नेता माधवकुमार नेपालसँग भेटवार्ता गरेका छन् ।

आइतवार अपराह्न ओलीले नेता नेपाललाई फोन गरेर बालुवाटार आउन आग्रह गरेका थिए ।

ओलीको आग्रहपछि बालुवाटार गएका नेता नेपालसँग ओलीले अर्का अध्यक्ष पुष्पकमल दाहाल 'प्रचण्ड'ले सचिवालय बैठकमा पेश गरेको प्रस्ताव फिर्ता लिन लगाउनु पर्ने धारणा राखे ।

जवाफमा नेता नेपालले यसबारे बैठकमै कुरा गर्न सुझाव दिएको स्रोतले दाबी गर्यो ।

आइतवार नै ओलीले उपाध्यक्ष वामदेव गौतमलाई बालुवाटार बोलाएर पार्टी विवाद समाधानका निम्ति प्रचण्डको प्रस्ताव फिर्ता गर्नुपर्ने धारणा राखेका थिए ।

पार्टीभित्र विवाद बढिरहेका बेला ओलीले नेता नेपालसँग कात्तिक महिनामा मात्र ५ पटक छलफल गरिसकेका छन् ।

नेता नेपालले भने ओली सच्चिन जरुरी रहेको धारणा राख्दै आएका छन् ।

शुक्रवार बसेको सचिवालय बैठकमा प्रचण्डले ओलीमाथि एक दर्जन आरोपसहित प्रस्ताव पेश गरेका थिए ।

दर्जन बढी आरोपका साथ प्रचण्डले प्रस्ताव पेश गरेपछि ओली पक्ष क्रुद्ध भएको छ । प्रस्ताव फिर्ता नलिए बैठक नै नबस्ने चेतावनी ओलीनिकट नेताहरूले दिइरहेका छन् ।

तर प्रचण्डलगायत असन्तुष्ट अन्य ५ नेताले प्रस्ताव सबैको सहमतिमा लेखिएको भन्दै त्यसमाथि छलफल हुनुपर्ने अडान लिएका छन् ।