शहरी विकासमन्त्री कृष्णगोपाल श्रेष्ठले नेपाल संवत्लाई नेपालको नयाँ संवत्को रूपमा थालनी गर्नुपर्ने बताएका छन् ।

नेपाल संवत् ११४१ को अवसरमा मध्यपुर थिमीमा  राष्ट्रिय विभुति शंखधर साख्वाःको प्रतिमामा माल्यार्पण गर्दै उनले नेपालको आफ्नै संवत्को रूपमा नेपाल संवत् प्रयोगमा ल्याउनुपर्ने बताए ।

सबै जाति र भाषाभाषीको अपनत्व हुने गरी नेपाल संवत्लाई प्रचलनमा ल्याउनुपर्ने धारणा राख्दै उनले सबैले नेपाल संवत्लाई नेपालीले कामकाजमा समेत प्रयोग गर्नुपर्ने बताए ।

शंखधर साख्वालाई राष्ट्रिय विभुति घोषणा गराउनेदेखि टिकट प्रकाशनसँगै नेपाल भाषा उत्थान नेपाल संवत् मनाउन महत्त्वपूर्ण भूमिका खेल्ने पूर्वमन्त्री एवं मानव अधिकारवादी नेता स्व. पद्मरत्न तुलाधरको योगदानको चर्चा गर्दै मन्त्री श्रेष्ठले उनको सम्झनामा सरकारले रत्नपार्कमा शालिक स्थापना गर्ने अन्तिम तयारी गरेको जानकारी गराए ।

नेपाल संवत् र न्ह्ुदया भिन्तुनाको हरेका कार्यक्रममा  अंग्रपंक्तिमा खटिने नेता तुलाधरको योगदानलाई कसैले पनि बिर्सन नसक्ने उनले बताए । उनले मंसिर ६ गते रत्नपार्कको नाम शंखधर साख्वा पार्क नामाकरण गरी  पार्क परिसरमा साख्वाः र तुलाधारको पूर्णकदको शालिक अनावरण गरिने जानकारी दिए ।

गरीब नेपालीको ऋणमोचन गर्ने शंखधर साख्वाःले गरेको योगदानको कदर गर्दै उनले शुरूआत गरेको नेपाल संवत्लाई सबैले प्रयोग गर्नुपर्ने उनको भनाई थियो । 

प्रतिमा माल्यार्पण कार्यक्रममा बोल्दै पूर्वमन्त्री एवं नेपाली कांग्रेसका सांसद भीमसेनदास प्रधानले कामकाजी भाषाको रूपमा नेपाल संवत्लाई प्रयोगमा ल्याउनुपर्ने बताए । उनले भने, ‘अहिले त नेपाल संवत् नेवार समुदायले मात्र मानेको जस्तो भएको छ । सबैको अपनत्व हुने गरी यस्लाई व्यापक बनाउनुपर्छ ।’

न्युदया भिन्तुना र नेपाल संवत् मूल समिति गठन गर्दा नेवार बाहेकका जातिलाई पनि समेट्नुपर्ने बताउँदै उनले भने, ‘नेपाल संवत् सबै नेपालीको संवत् हो, अहिलेसम्म किन नेवारको मात्र देखिएको छ ? त्यसैले यसलाई सरकारले राष्ट्रिय पर्वको रूपमा मान्यता दिन नसकेको हुनसक्छ । आगामी वर्ष नेपाल संवत् मनाउँदा यस विषयमा गम्भीर छलफल आवश्यक छ ।’

नेपाल संवत् ११४१ को अवसरमा काठमाडौं र ललितपुरमा पनि विविध कार्यक्रम आयोजना गरिएको थियो ।