सिरहाका सीमावर्ती क्षेत्रमा सरकारी अनुदानको आयोडिनयुक्त नून सहजै पाउन थालेपछि यसको प्रयोग गर्नेहरूको संख्यामा वृद्धि भएको हो ।  

वर्षौंदेखि ढिके नुनको प्रयोग गर्दै आएका स्थानीय पछिल्लो समय आयोडिनयुक्त नूनको प्रयोग गर्न थालेका हुन् ।

आयोडिनयुक्त नूनको महत्त्व र फाइदाबारे व्यापक प्रचारप्रसार, स्थानीय प्रशासनले भारतीय नूनको आयातमा गरिएको कडाइ र सहजै आयोडिनयुक्त नून पाउन थालेपछि सीमावर्ती ग्रामीण क्षेत्रमा ढिके नूनको प्रयोग घट्दै गएको हो । 

पछिल्लो समय यस क्षेत्रका नागरिकमा २ बालबालिकाको चिह्न भएको आयोडिनयुक्त नूनप्रति आकर्षण बढेको बरियापट्टी गाउँपालिका–४ का सरोजकुमार महतोले बताए । उनले भने, ‘आयोनूनको फाइदाबारे थाहै थिएन, त्यसैले हामी भारतीय ढिके नूनको प्रयोग गर्दै आएका थियौं, अब भने आयोडिनयुक्त नूनकै प्रयोग गर्न थालेका छौं ।’ 

साल्ट ट्रेडिङ कर्पोरेसन लिमिटेडले गाउँमै आयोडिनयुक्त नूनको महत्त्व, उपयोगिता र फाइदाबारे प्रचारप्रसार गरेर बिक्री गर्न थालेपछि यसप्रति उपभोक्ताको आकर्षण बढेको उनको भनाइ छ ।

आयोडिन नून उपभोगले बालबालिकामा गलगाड आउने, लाटो लठेब्रो हुने जस्ता शारीरिक समस्या कम हुँदै जान्छ भने मानसिक रुपमा फुर्तिलो, शारीरिक रुपमा स्वस्थ्य, स्मरण शक्तिको वृद्धिसँगै बालबालिकामा पढ्ने रुचीको विकास हुने हुँदा आयोडिनयुक्त नुनको प्रयोग बढ्दै गएको सखुवानन्कारकट्टी गाउँपालिकाका शम्भु यादवले बताए । उनले भने, ‘करीब २ वर्ष अघिसम्म गाउँका अधिकांश व्यक्तिले भारतीय ढिके नूनको प्रयोग गर्थें तर अब अधिकांशले आयो नूनको प्रयोग गर्न थालिसकेका छन् ।’