पार्टीभित्रको विवाद उत्कर्षमा पुगेको समयमा बुधवारका लागि निर्धारित सचिवालय बैठक प्रभावित हुन नदिन नेकपाका दोस्रो तहका नेताहरूले सक्रियता बढाएका छन् ।

यसक्रममा महासचिव विष्णु पौडेलले कार्यकारी अध्यक्ष पुष्पकमल दाहाल प्रचण्डसँग मंगलवार भेटवार्ता गरेका छन् । 

सहमतिको प्रयास स्वरूप महासचिव पौडेलले प्रचण्डसँग मंगलवार कुराकानी गरेका हुन् ।

नेकपा संसदीय दलका उपनेता सुवास नेम्वाङले भोलिको बैठक प्रभावित हुन नदिन सहमतिको प्रयास भइरहेको जानकारी दिए । 

‘आजै मात्र महासचिव पौडेलले अध्यक्ष प्रचण्डसँग भेटवार्ता गर्नुभएको छ, सहमतिका लागि प्रयास भइरहेका छन्,’ नेम्वाङले लोकान्तरसँग भने । 

स्रोतका अनुसार भेटमा प्रचण्डले आफूले सचिवालय बैठकमा पेश गरेको प्रस्ताव फिर्ता नलिने सन्देश पठाएका छन् । 

पूर्व माओवादी खेमाका दोस्रो तहका नेताहरूले पनि पार्टी एकता जोगाउने भन्दै सक्रियता देखाएका छन् । 

गत २८ गते बसेको नेकपा सचिवालय बैठकमा अध्यक्ष प्रचण्डले अर्का अध्यक्ष ओलीसँग समन्वय विना नै राजनीतिक प्रस्ताव पेश गरेपछि नेकपा विवाद बल्झिएको छ ।

ओली पक्षले प्रचण्डको प्रस्ताव पार्टीमा छलफल नहुने भन्दै फिर्ता लिन दबाब दिएको छ । 

प्रचण्डसहित माधव नेपाल, झलनाथ खनाल, वामदेव गौतम र नारायणकाजी श्रेष्ठ समूहले सो प्रस्ताव आफूहरूको सामूहिक भएको भन्दै फिर्ता नगर्ने अडान लिएका छन् ।

प्रस्ताव फिर्ता लिनुपर्ने ओली पक्षको दबाब र फिर्ता नगर्ने प्रचण्ड पक्षको अडानका कारण भोलिका लागि पूर्वनिर्धारित सचिवालय बैठक प्रभावित हुने संकेत देखिएको छ । 

सचिवालय बैठक बोलाउन माग गर्दै सचिवालयका बहुमत सदस्यले कात्तिक २२ गते लिखित पत्र दिएपछि कात्तिक २८ मा सचिवालय बैठक बसेको थियो । 

शुक्रवार केहीबेरका लागि बसेर सचिवालय बैठक बुधवारसम्मका लागि स्थगित भएको थियो । 

राजदूत सिफारिश, मन्त्रिपरिषद् विस्तारसँगै शुरू भएको नेकपा विवादको पछिल्लो शृंखला प्रचण्डको पत्रसँगै नयाँ चरणमा प्रवेश गरेको छ ।