कर्तव्य ज्यान, अपहरण तथा शरीर बन्धक र नागरिकता मुद्दाका फरार १ अभियुक्त पक्राउ परेका छन् ।

८ वर्षअघि २२ वर्षीय किशोरलाई अपहरण गरेर कर्तव्य गरी मारेर फरार रहँदै आएका एकडारा गाउँपालिका–३ का जीवछ अन्सारीलाई महोत्तरीको जलेश्वर नपा–३ भिठ्ठामोडबाट बुधवार प्रहरीले पक्राउ गरिएको जिल्ला प्रहरी कार्यालय महोत्तरीका प्रहरी उपरीक्षक टीकाबहादुर केसीले बताए ।

जिल्ला प्रहरी कार्यालयले बिहीवार पत्रकार सम्मेलन गरी पक्राउ परेका अन्सारीलाई सार्वजनिक गरेको हो । 

प्रहरी उपरीक्षक केसीका अनुसार पक्राउ परेका अन्सारीले ४/५ जनासँग मिलेर विक्रम संवत् २०६९ चैत ४ गते जिल्लाकै सोनमा गाउँपालिका–८ का श्याम राय यादवका छोरा १२ कक्षामा अध्ययनरत २२ वर्षीय पंकज यादवलाई ललाइफकाई जलेश्वर घुमाउने भनी ल्याएर अपहरण गरी लागूऔषध सेवन गराई अर्धचेत भएपछि जलेश्वर नपा–१ स्थित राविम क्याम्पसको चौरमा निजको घाँटी रेटी हत्या गरेका थिए । पंकज धनुषाको जनकपुर नगरपालिकाको पिडाडीचोकमा डेरा गरी बस्दै आएका थिए ।

पक्राउ परेका अन्सारीले नै ल्याएको छुराबाट ४–५ जना मिलेर किशोर यादवको हत्या गरी उनले नै बोकी ल्याएको खुर्पा र कोदालोले घटनास्थल नजिकै रहेको रातुखोलाको बगरमा खाल्डो खनी शव गाडेका थिए । साथै मृतकका बुवा श्याम राय यादवलाई विक्रम संवत् २०६९ चैत १० गते सिरहा जिल्लाको लक्ष्मीपुरस्थित कमला नगरमा बोलाई ७ लाख नेपाली फिरौतीसमेत लिएका थिए । 

महोत्तरी जिल्ला अदालतले निज अन्सारीको हकमा विक्रम संवत् २०७२ जेठ १८ गते अपहरण तथा शरीर बन्धक मुद्दामा १७ वर्ष कैद र २ लाख ७५ हजार जरिवाना तोकेको छ भने कर्तव्य ज्यान मुद्दा मुल्तवीमा छ । उनले झुठा विवरण पेश गरेर विक्रम संवत् २०५१ सालमा नेपाली नागरिकता लिएकामा उनी उपर २०६२ सालमा जिल्ला प्रशासन कार्यालय महोत्तरीमा नागरिकता मुद्दासमेत चलाइएको छ ।
 
विद्यार्थी यादवको अपहरण तथा हत्या मुद्दामा यसअघि २ जना पक्राउ परिसकेको र उनीहरू कारागारमा कैदी जीवन बिताइरहेका छन् भने २/३ जना अझै फरार छन् ।