शनिवार चितवनमा आयोजित कार्यक्रममा पूर्वमन्त्री तथा नेकपा नेता सुरेन्द्र पाण्डेमाथि कार्यकर्ताबाटै अभद्र दुर्व्यवहार भएपछि नेकपाका नेताहरूले विरोध गरिरहेका छन् ।

संस्कृति, पर्यटन तथा नागरिक उड्ययन मन्त्री योगेश भट्टराईले सामाजिक सञ्जाल ट्विटरमा लेख्दै हुलहुज्जत बहुदलीय जनवादको कोर्स नभएको स्मरण गराएका छन् । 

उनले लेखेका छन्, ‘हुलहुज्जत बहुदलीय जनवादको कोर्श होइन । बिमर्श, छलफल र फरक मतको सम्मान जबजको विशेषता हो !’

चितवनको राप्ती नगरपालिकामा आयोजित एक कार्यक्रममा मन्तव्य दिँदै गरेका नेता पाण्डेविरुद्ध केही व्यक्तिको समूहले नाराजुलुस गरेको थियो । घटनालाई नेकपाभित्रको गुटगत विवादका रूपमा लिइएको छ । प्रधानमन्त्री केपी शर्मा ओली पक्षका नेताकार्यकर्ताहरूले नेता पाण्डेको विरोधमा नाराजुलुस गरेको उनका सहयोगी सञ्जिव पाण्डेले लोकान्तरसँग बताएका छन् ।

हुलहुज्जत बहुदलीय जनबादको कोर्श होईन
बिमर्श, छलफल र फरकमतको सम्मान जबजको बिशेषता हो !

— Yogesh Bhattarai (@yogesbhattarai) November 21, 2020

पूर्व प्रधानमन्त्री एवं नेपाल कम्युनिस्ट पार्टीका वरिष्ठ नेता माधवकुमार नेपालले समेत स्थायी कमिटी सदस्य सुरेन्द्र पाण्डेविरुद्ध भएको नाराबाजीको निन्दा गरेका छन् । शनिवार दिउँसो एक विज्ञप्ति जारी गर्दै वरिष्ठ नेता नेपालले घटनाको निन्दा गरेका हुन् । 

उनले लेखेका छन्, ‘गृह जिल्लाका विकास आयोजनाहरूको अनुगमन तथा पार्टीका कार्यक्रमहरूमा सहभागी हुने क्रममा चितवनमा रहनुभएका हाम्रो पार्टीका स्थायी कमिटी सदस्य, पूर्व अर्थमन्त्री तथा प्रतिनिधिसभा सदस्य कमरेड सुरेन्द्र पाण्डे आज राप्ती नगर पार्टीको बैठकमा सहभागी भई मन्तव्य राखिरहेको बेला अनाधिकृत रूपमा प्रवेश गरेका केही व्यक्तिहरूले सुनियोजित रूपमा गरेको अभद्र ब्यबहार तथा नाराबाजीको निन्दा एवम् भर्त्सना गर्दछु ।’

सभ्य, सुसंस्कृत एवम् समुन्नत समाज निर्माण गर्ने उद्धेश्य बोकेको कम्युनिस्ट आदर्श अवलम्बन गर्ने लोकतान्त्रिक कम्युनिष्ट पार्टीका लागि पटक्कै नसुहाउने भन्दै उनले उक्त कार्य गर्ने/गराउने जोसुकै भएपनि छानविन गरी कडाभन्दा कडा कारबाही गर्न गम्भीर ध्यानाकर्षण गराएका छन् ।