भारतको बिहारमा भाजपा–जदयूको सरकार बन्नेबित्तिकै भाजपाको पूरा ध्यान पश्चिम बंगालमा केन्द्रित भएको छ । 

सन् २०२१ मा पश्चिम बंगाल विधानसभा चुनाव छ र यसपालि भाजपाले बंगालबाट ठूलो आशा गरिरहेको छ । 

लोकसभा निर्वाचनमा भाजपाले पश्चिम बंगालमा १८ सीट जितेको थियो र तृणमूल कांग्रेसलाई झट्का दिएको थियो । 

बंगालमा भाजपा २०० प्लसको नारा लिएर मैदानमा ओर्लेको छ । यसका लागि ऊ आक्रामक देखिन संशोधित नागरिकता कानून छिटो लागू गराउने कुरा गरिरहेको छ । 
 

भाजपाले बंगालका लागि कोर टीम गठन गरेको छ । त्यसमा ११ मानिस छन् । धेरैजसो केन्द्रीय नेता यस कोर टीममा छन् । 

सबै समीकरणलाई ध्यानमा राख्दै यो कोर टीम बनाएको हो । कोर टीम हरेक विधानसभा क्षेत्रको मूड र समीकरण बुझेर उम्मेदवारहरूको आधारभूत सूची बनाउनेछ । कुनै पनि सीटमा कमजोर उम्मेदवार नउठाउने उसको सोच छ । 

पश्चिम बंगालमा २९४ विधानसभा क्षेत्र छन् । भाजपाले यिनलाई पाँच जोनमा बाँडेको छ । 

पश्चिम बंगालमा भाजपाका कैयौं नेताहरू तृणमूल कांग्रेसबाट आएका छन् । पार्टीभित्र गुटहरूको चलखेल छ । गुटबन्दीका कारण आफूलाई घाटा नलागोस् भनी केन्द्रीय नेतृत्वले निकै ध्यान दिइरहेको छ । 

पार्टीका राष्ट्रिय अध्यक्ष जेपी नड्डा र पूर्व अध्यक्ष अमित शाह आफैं कमान्ड सम्हालिरहेका छन् । उनीहरू महिनाको एकपटक पश्चिम बंगाल पुग्ने भएका छन् । रणनीति बनाउन मात्र नभई समर्थक तथा मतदातामा अपनत्वको सन्देश प्रवाह गर्न पनि उनीहरूको नियमित भ्रमण राखिएको हो । 
 

भाजपाले नारा पनि एई बार बांग्ला, पारले सामला भनेर दिएको छ । यसको अर्थ हो – अब बंगालको पालो, रोक्न सके रोक । यस नाराले पनि भाजपाको आक्रामक दृष्टिकोणलाई उजागर गर्छ । 
 

भाजपाले पश्चिम बंगाल चुनावमा पनि प्रधानमन्त्री नरेन्द्र मोदीको अनुहार भजाउन खोजेको छ । मोदीको लोकप्रियता कायम छ र मतदाताहरू उनको नाममा भोट दिन्छन् भन्ने कुरा बिहार विधानसभा चुनावले स्पष्ट पारिसकेको छ । 

पश्चिम बंगालको ममता बनर्जी सरकारप्रति भाजपा आक्रामक छ । केन्द्र सरकारले बनाएका योजनाहरूको फाइदा पश्चिम बंगालका मानिसहरूसम्म ममता सरकराले पुग्न नदिएको भनी भाजपाले जनतालाई लगातार बताइरहेको छ ।