पेन्टिङको काम गरेर किनेको मोटरसाकइल हराउँदा एकछिन बसेरै रोए, ४ वर्षपछि भेटिँदा दंग

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

उमाकान्त दवाडी महानगरीय ट्राफिक प्रहरी महाशाखा बग्गीखानामा ४ वर्षअगाडि हराएको मोटरसाइकलको अगाडि बसेर मुस्कुराइरहेका थिए । 

‘प्रहरीले खोज्ला र बाइक भेटिएला भन्ने त लागेकै थिएन । तपाईंको कहिले हराएको ?’ दवाडीले नजिकै रहेका अर्का एक जनासँग भन्दै थिए ।


Advertisement

दवाडी २०७४ सालमा पेन्टिङको काम गर्थे । काठमाडौं संर्घषको जीवन बिताइरहेका उमाकान्तलाई त्यो बेलामा मोटरसाइकल किन्ने सपना जस्तै थियो । 

घरमा पेन्टिङ गर्दै साथीभाइसँग ऋण र सपाटी पैसा लिएर नुवाकोटका एक जना चिने जानेका साथीसँग १० हजार पैसा पछि दिने शर्तमा बा २४ प ५२९८ नम्बरको साइन बाइक किनेका थिए । 


Advertisement

त्यसको १५ दिनपछि उनले एउटा घरको पेन्टिङ गर्न अग्रिम लिएको पैसाले मोटरसाइकल पास गरेका थिए ।

पेन्टिङकै काम गर्ने क्रममा उनले ठमेलमा एउटा होटलमा पेन्टिङ गर्ने जिम्मा पाए । उनले बाइक बाहिर राखेरभित्र पेन्टिङ गरिराखेको अवस्थामा २०७४ फागुन २९ गते बाइक हरायो ।

काम सकेर बेलुका घर जान बाहिर निस्किँदा उनको मोटरसाइकल चोरी भइसकेको थियो ।

किनेको ३ महिना नहुँदै मोटरसाकइल हराएपछि उनका आँखामा आँसु आएको कुरा अहिले पनि सम्झन्छन् ।

‘कलर गर्ने मान्छे, सानो दुःखले किनेको थिइनँ । बाइक हराउँदा त आँसु नै झर्‍यो,’ उमाकान्तले लोकान्तरसँग भने, ‘हराएको २ दिन त खाना खान पनि मन लागेन, काम गर्न पनि ।’

त्यसपछि उनले अर्को दिन कसैले त्यहीँ ल्याएर राखिदिन्छ कि भनेर हेरे, तर उनको त्यो आशा मात्रै थियो । काम गर्ने घरकै साहुको सल्लाहमा उनले महानगरीय ट्राफिक प्रहरी बग्गीखानामा उजुरी दिए ।

२ वर्ष पुगिसक्दा पनि नभेटिएपछि उनले फेरि अर्को मोटरसाइकल किनेर चढ्न थाले । तर दुःखले किनेको मोटर साइकल भएकाले नम्बर भने बिर्सेका थिएनन् ।

‘दुःखले नै किनेको भएर होला नम्बर बिर्सेको थिइनँ, अझै पनि बिर्सिदिनँ,’ उमाकान्तले लोकान्तरसँगको कुराकानीमा भने ।

उनले त्यो मोटरसाइकलको माया नै मारिसकेका थिए । तर १५ दिन अगाडि उनले ठमेलमै एक जना मानिसले चढेको फेला पारे । उनले उक्त मोटर साइकललाई रोकेरै सोधे, ‘यो मोटरसाइकल कोसँग किनेर चढ्नुभएको हो ?’ 

मोटरसाइकल चढ्ने व्यक्ति सादा पोशाकका प्रहरी थिए । चोरीको मोटरसाइकल बरामद भएपनि वास्तविक धनी सम्पर्कमा नआएकाले आफूले चढेको जवाफ उनले दिए ।

‘प्रहरीले १ वर्ष अगाडि नै भेट्टाएको रहेछ, यातायातको ढड्डामा भएको फोन नम्बर म पहिले बस्ने घरबेटीको भएका कारण म कहाँ सम्पर्क नभएको रहेछ,’ उमाकान्तले भने ।

४ वर्षपछि भएपनि उनी अहिले खुशी छन् । 

‘म धेरै खुशी छु, यो मोटरसाइकल बेच्दिनँ दुःखमा किनेको भएर होला भेटियो,’ उकामान्तले हँसिलो अनुहारमा भने ।

त्यस क्रममा महानगरीय ट्राफिक प्रहरी प्रमुख एसएसपी भीम ढकालले आफ्ना सवारी सुरक्षित ठाउँमा पार्किङ गर्न अनुरोध गरे ।

‘आफ्नो सवारी साधनलाई सुरक्षित ठाउँमा पार्किङ र डबल लक लगाउँदा चोरिने सम्भावना कम हुन्छ,’ एसएसपी ढकालले भने ।

जाँदा जाँदै एसएसपी ढकालले घूस नलिने १९ जना ट्राफिक प्रहरीलाई सम्मान गरेका छन् । 

‘शून्य सहनशीलतालाई अक्षरसः पालना गरेर घूस इन्कार गर्ने ट्राफिक प्रहरीलाई प्रोत्साहन स्वरुप सम्मान गरेका हौं,’ एसएसपी ढकालले भने, ‘एक वर्षमा यस्ता एकसय जना प्रहरीलाई सम्मान गरिसकेका छौं ।’

उपत्यकाको ट्राफिक व्यवस्थापन प्रविधिमैत्री बनाउँछौंः नयाँ ट्राफिक प्रमुख भट्टराई

उपत्यकाको ट्राफिक व्यवस्थापनले देशभरिको ट्राफिकलाई झल्काउने भएकाले उपत्यकाको ट्राफिक व्यवस्थापनलाई प्रविधिमैत्री बनाउने नयाँ आएका ट्राफिक प्रमुख एसएसपी जनक भट्टराईले बताए ।

‘उपत्यकाको ट्राफिक नै देशभरको ट्राफिक व्यवस्थापनको केन्द्र भएकाले यसलाई राम्रो बनाउने प्रयास गर्नेछु,’ एसएसपी भट्टराईले भने ।

गगन अर्याल
गगन अर्याल

लेखकबाट थप...

कमेन्ट गर्नुहोस्