सुदूरपश्चिममा पेट्रोलियम पदार्थको भण्डारण क्षमता बढाउन पहल

फाइल फोटो

नेपाल आयल निगमले सुदूरपश्चिम प्रदेशमा पेट्रोलियम पदार्थको भण्डारण क्षमता बढाउन नयाँ डिपो स्थापनाको पहल गरेको छ ।

निगम प्रादेशिक कार्यालय धनगढीका प्रमुख चित्तरञ्जन दासले पेट्रोलियम पदार्थको भण्डारण क्षमता बढाउने सरकारको नीतिअनुसार सुदूरपश्चिम प्रदेशमा नयाँ डिपो स्थापनाको पहल भएको बताए ।
 
यसका लागि कैलालीको गोदावरी नगरपालिका, स्याउले बजार नजिक रहेको शिवशक्ति महिला सामुदायिक वन क्षेत्रको जग्गाको पहिचान गरिएको जनाइएको छ । उद्योग, वाणिज्य तथा आपूर्तिमन्त्री लेखराज भट्ट नेतृत्वको टोलीले केही दिनअघि सो जग्गाको स्थलगत रूपमा अध्ययन गरेको थियो ।


Advertisement

‘नयाँ डिपो स्थापनाका लागि पहिचान गरिएको यो जग्गा प्राप्तिको पहल गर्न लागिएको छ,’ दासले भने, ‘जग्गा प्राप्तिपछि ‘भर्टिकल‘ ट्यांकी सहितका संरचना निर्माणको प्रक्रिया शुरू गरिने छ ।’

झण्डै ४ दशकअघि धनगढीको चटकपुरमा स्थापित निगमको कार्यालय परिसरमा पेट्रोलिम पदार्थको भण्डारण क्षमता घट्दै गएको छ । सुदूरपश्चिम प्रदेशमा हाल दैनिक ४०० किलोलिटर डिजल र २०० किलोलिटर पेट्रोलको माग रहेको जनाइएको छ । मागका आधारमा निगमसँग ३ दिनलाई पुग्ने क्षमताको डिजलको ट्यांकी र आधा दिनलाई पुग्ने क्षमताको पेट्रोलको ट्यांकी मात्र छन् ।


Advertisement

माग बढ्दै जाँदा डिपोमा भण्डारण गरिने पेट्रोलियम पदार्थले धान्न नसक्दा ढुवानी गर्ने ट्यांकरमा नै पेट्रोलियम पदार्थ भण्डारण गरिराख्नुपर्ने अवस्था छ ।
  
कार्यालय परिसरमा रहेको भण्डारण डिपो पछिल्ला वर्षमा मानव बस्तीले घेरिन थालेसँगै कुनै पनि समयमा जोखिम निम्तिनसक्ने खतरा पनि छ । डिपो परिसरमा पेट्रोलियम पदार्थ लिएर आउने ट्यांकर अड्याउने ठाउँ समेत अभाव हुँदा कार्यालय बाहिर रहेको ‘६ लेन‘ सडकका छेउमा ट्यांकर अड्याएर राख्नुपर्ने अवस्था छ ।

कमेन्ट गर्नुहोस्