महासचिव पौडेल भन्छन् - पार्टीको समस्या ‘लीक’बाहिर जाँदैछ, सम्हाल्ने प्रयास भइरहेको छ

प्रकाश आचार्य
प्रकाश आचार्य

लोकान्तर संवाददाता आचार्य लुम्बिनी प्रदेशबाट रिपोर्टिङ गर्छन् ।

सत्तारूढ दल नेपाल कम्युनिस्ट पार्टी (नेकपा) महासचिव तथा अर्थमन्त्री विष्णु पौडेले पार्टीभित्रको अन्तरिक विवाद ‘लीक’ बाहिर जाने खतरा देखिएको बताएका छन् । पार्टीमा अनायासै प्रकट भएका समस्याले निम्त्याएका गतिविधि मर्यादाबाहिर पुगेको उनको दाबी छ ।

अर्थमन्त्री भएपछि पहिलोपटक गृहजिल्ला आएका पौडेलसँग प्रेस संगठन नेपाल, रुपन्देहीले मंगलबार साँझ बुटवलका गरेको पत्रकार सम्मेलनमा बोल्दै पौडेलले भने, ‘अध्यक्षद्वयबीचको विवाद ‘लीक’ बाहिर जान खोजेको देखिन्छ । नेता कार्यकताहरु पनि मर्यादाबाहिर गएको देखियो । हामी दोस्रो तहका नेताहरू विवाद ‘लीक’मा ल्याउन प्रयासमा छौं । पार्टीको अन्तरविरोध हटाउँदै एकता बचाउन सबै लाग्नुपर्ने अहिलेको आवश्यकता हो ।’


Advertisement

पौडेलले थपे, ‘पार्टीमा परिस्थिति कल्पना गरेभन्दा पृथक देखियो । पार्टीको समस्या समाधान गर्न सबै केन्द्रित हुनुको विकल्प छैन । पार्टीमा कसैले पनि विभाजन नचाहेको भन्दै एकता नचाहनेलाई किनारा लगाउनुपर्ने अहिलको आवश्यकता हो । हामी त्यही ढंगले कोशिस गरेका छौ । पार्टीको आन्तरिक जीवनमा आएको समस्याले कार्यकताहरुलाई चिन्तित बनाएको छ ।'

महासचिव पौडेलले कांग्रेस सभापति शेरबहादुर देउवासँग प्रधानमन्त्रीको भेटघाट नियमित हुने छलफल जस्तै भएको बताए । उनले भने, ‘नेकपासँग सुविधाजनक बहुमत छ । कांग्रेससँग किन सत्ताको विषयमा छलफल गनुपर्‍यो ? प्रधामन्त्री र सभापति देउवाबीच नियमति हुने छलफल भएका हो । त्यसलाई सत्ता समिकरणसँग जोडेर हेर्न आवश्यक छैन ।’


Advertisement

पौडेलले राजधानी बुटवलबाट दाङ गए पनि बुटवल विकास र समृद्धिमा कहिल्यै पछाडि नपर्ने स्पष्ट पारे । पौडेलले भने, ‘राजधानी बुटवल बनाउने भनेका थियौ । एउटा प्रक्रियाबाट टुंगो लाग्यो । यो ठाउँ विकासबाट पछाडि पर्दैन । यहाँ अहिले पनि विकासका योजना लामबद्ध छन् । यो ठाउँको विकासका योजनामा विमर्श र सहकार्य गर्न तयार छौं ।’

प्रदेश सरकारले रुपन्देही, कपिलवस्तु र नवलपरासीलाई जोडेर आर्थिक राजधानी बनाउने निर्णय कार्यान्वन गर्न सफल बनाउनुपर्ने बताए ।

पौडेलले निर्वाचनका बेला घोषणा गरेका प्रतिवद्धता चरणबद्ध रुपमा पूरा हुँदै जाने बताए । कोरोना महामारीले थला परेको देशको अर्थव्यवस्थालाई पुर्नताजगी दिन आफू शुक्ष्म ढंगले अध्ययन गरी लागेको जानकारी समेत मन्त्री पौडेलले दिए ।

जनताका पक्षमा एकपछि अको सकारात्मक काम गर्दै जाने मन्त्री पौडेलको प्रतिबद्धता छ । पौडेलले कोरोनाको निशुल्क जाँच र उपचारबाट सरकार पछाडि नहटेको समेत स्पष्ट पारे । उनले कोरोनाविरुद्धको भ्याक्सिन ल्याउने विषयमा पनि सरकारले गृहकार्यलाई तीव्रताका साथ अगाडि बढाइरहेको जानकारी गराए । पौडेलले बुधबार बुटवलमा विभिन्न आयोजनाहरुको शिलन्यास गर्ने कार्यक्रम छ ।

 

 

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्