८ घण्टासम्म सम्पर्कविहीन बने डीएसपी, खोज्दा होटलको कोठामा भेटिए

जीवन विष्ट
जीवन विष्ट

विष्ट लोकान्तरका लागि सुदूरपश्चिम प्रदेश प्रतिनिधि हुन् । 

गएराति कैलालीको गौरीगंगा नगरपालिकास्थित चौमालामा सवारी दुर्घटना भएपछि जिल्ला प्रहरी कार्यालय कैलालीबाट इलाका प्रहरी कार्यालय मालाखेतीका इञ्चार्ज तथा प्रहरी नायव उपरीक्षक भरत चौधरीको खोजी शुरू भयो । सेट मोनिटरिङमा उनी सम्पर्कमा आएनन् । 

‘ट्रकको ठक्करबाट गम्भीर घाइते भएका मोटरसाइकल चालक अर्जुनको उपचारका क्रममा मृत्यु भयो तर त्यतिबेलासम्म पनि प्रहरी नायब उपरीक्षक चौधरी सम्पर्कमा आएनन्,’ प्रदेश प्रहरी कार्यालयका वरिष्ठ प्रहरी उपरीक्षक मुकेशकुमार सिंहले भने, ‘त्यसपछि कैलालीका प्रवक्ता तथा प्रहरी नायव उपरीक्षक प्रतीक विष्टको नेतृत्वमा र प्रदेश प्रहरी कार्यालयबाट छुट्टाछुट्टै टोली राति नै परिचालन गरियो ।’


Advertisement

सेट मोनिटरिङमा नभेटिएपछि रातिदेखि नै खोजी शुरू भएका डिएसपी चौधरी आज बिहान मात्रै कैलालीकै पहाडी क्षेत्र बूढीतोलमा फेला परे । 

‘सोधपुछका क्रममा सूचना संकलनका लागि पहाडी इलाका गएको र त्यहाँ फोन नलाग्ने समस्या रहेको चौधरीको जवाफ थियो,’ प्रहरी वरिष्ठ उपरीक्षक सिंहले भने, ‘बिहान बूढीतोलाको एक होटलमा डीएसपी चौधरी फेला परे । उनी सवार मोटरसाइकल होटलअगाडि थियो । उनी होटलको एक कोठामा एक्लै भेटिएका थिए ।’


Advertisement

‘अस्थायी प्रहरी पोस्ट जुगेडामा कार्यरत दुईजना प्रहरीको विभत्स हत्या भएको डेढ महिना नबित्दै प्रहरी नायब उपरीक्षक सम्पर्कविहीन भएपछि हामीले खोज गर्न शुरू गरेका थियौं, तर उहाँ सकुशल भेटिनुभयो,’ वरिष्ठ प्रहरी उपरीक्षक सिंहले भने ।

डीएसपी छानबिनका लागि जिल्ला तानिए

८ घण्टा सम्पर्क विहीन बनेका इलाका प्रहरी कार्यालय मालाखेतीका प्रमुख प्रहरी नायव उपरीक्षक (डीएसपी) भरतराज चौधरी जिल्ला तानिएका छन् । 

चौधरीमाथि छानबिन गर्न जिल्ला तानिएको प्रहरीले जनाएको छ ।

ड्युटीको समयमा सम्पर्कविहीन भएका चौधरी ८ घण्टापछि होटलमा युवतीसँग फेला परेका थिए । ड्युटी चेक गर्दा फेला नपरेर जिल्लामा तानेको पुष्टि गर्दै सुदूरपश्चिम प्रदेश प्रहरी प्रवक्ता एसएसपी मुकेश सिंहले चौधरीलाई जिल्लामा छानबिन भइरहेको जानकारी दिए । 

‘हामीले छानबिनका लागि उनलाई जिम्मेवारीबाट मुक्त गर्दै जिल्ला तानेका छौं । अनुसन्धानका क्रममा उनी दोषी भए कारवाहीको भागीदार हुन्छन्,’ एसएसपी मुकेश सिंहले भने ।

इलाका प्रहरी कार्यालय मालाखेतीमा तत्कालका लागि प्रहरी निरीक्षकलाई जिम्मेवारी दिइएको छ ।

जीवन विष्ट
जीवन विष्ट

लेखकबाट थप...

कमेन्ट गर्नुहोस्