अर्थमन्त्री तथा नेकपा महासचिव विष्णु पौडेलले वर्तमान सरकारले आफ्नो कार्यकाल पूरा गर्ने दाबी गरेका छन् । 

बुटवलमा बुधवार तिनाउ–दानव कोरिडोरको शिलान्यास गर्दैै पौडेलले सरकार ५ वर्ष पूरै टिक्ने दाबी गरे । 

उनले भने, ‘मुलुकमा कसैले अस्थिरता चाहेको छ भने त्यो पूरा हुन सक्दैन । जनताको विकास र समृद्धिलाई केन्द्रमा राखेर केपी ओली नेतृत्वको सरकार अगाडि बढेको छ ।’ 

अर्थमन्त्री पौडेलले थपे, ‘सरकार जनताको म्यान्डेडअनुसार अगाडि बढेको छ, कसैको चाहनाले ढल्दैन ।’

पौडेलले रुपन्देही विकास र समृद्धिको दिशामा तीव्र रूपमा अगाडि बढेको बताए । 

रुपन्देहीमा धेरै विकासका योजनाहरू अगाडि बढेका छन । तिनीहरूमा पनि धमाधम काम भइरहेका छन् । तिनाउ दानव कोरिडोर पनि यहाँको महत्त्वपूर्ण आयोजना हो ।

यसलाई पनि समयमै सम्पन्न गर्न सबैको खबरदारी आवश्यक रहेको पौडेलको भनाइ छ । 

करिडोरले तिनाउ नदीवारि र पारिबीच भएको विभेदलाई अन्त्य गरेको पौडेलको दाबी छ । 

‘तिनाउ र दानवलाई अभिषाप होइन, वरदानका रूपमा उपयोग गरिरहेका छौं । अहिले बन्न लागेको करिडोरका वासिन्दालाई गर्व गर्नलायक हुन्छ,’ पौडेलले भने ।

समयभन्दा अगाडि नै आयोजना पूरा गर्न पौडेलले निर्माण कम्पनीलाई आग्रह गरे । 

बुटवल बजार क्षेत्रको सडक विस्तारको काम अगाडि बढ्न नसक्दा बुटवलकै मुहार बिग्रिएको भन्दै अवरोध नगर्न उनले बुटवलवासीलाई आग्रह गरे ।

‘जनताका सरोकारका विषयमा हामी जनप्रतिनिधि जनतासँगै छौं । विकास आयोजना साझा सरोकारका विषय हुन्, अवरोध नगरौं,’ उनले भने ।

तिनाउ–दानव कोरिडोर वैकल्पिक सहायक राजमार्गको रूपमा विकास हुनेछ ।