भारतीय विदेश सचिव हर्षवर्द्धन श्रृंगलाले २ दिने भ्रमणका लागि काठमाडौं पुगेर भारत र नेपाल निकटतम मित्र रहेका प्रतिक्रिया दिएका छन् ।

त्रिभुवन अन्तर्राष्ट्रिय विमानस्थलमा सञ्चारकर्मीलाई नेपाली भाषामै प्रतिक्रिया दिँदै सचिव शृंगलाले नेपाल–भारत सम्बन्ध सुमधुर बनाउन आफूले छलफल गर्ने बताए ।

भारतीय विदेश सचिव शृंगलालाई नेपालका परराष्ट्र सचिव भरतराज पौड्यालले त्रिभुवन अन्तर्राष्ट्रिय विमानस्थलमा स्वागत गरेका थिए ।

‘नेपालमा आएर मलाई अत्यन्तै खुशी लागेको छ, रमाइलो लाग्यो,’ शृंगलाले भने, ‘म पहिला पनि काठमाडौं आएको छु तर विदेश सचिवको रूपमा पहिलो भ्रमण हो । भारत र नेपाल निकटतम मित्र हुन् । मेरो आज मिटिङ हुन्छ क्लोज रिलेसनशीप अगाडि बढाउनलाई ।’

उनले नेपालको परराष्ट्र मन्त्रालयका सचिव र मन्त्री प्रदीप ज्ञवालीसँग बिहीवार छलफल हुने जानकारी दिएका छन् । शुक्रवार शृंगलाले गोरखा र मनाङमा भारतीय सहयोगमा बनेका विद्यालय र गुम्बाको अवलोकन गर्ने कार्यक्रम रहेको जनाइएको छ ।

भारतीय प्रधानमन्त्री नरेन्द्र मोदीले गोरखामा भूकम्प प्रभावितका लागि ५० हजार घर बनाउने प्रतिबद्धता गरे अनुसार ४० हजार घर बनिसकेका बताउँदै विदेश सचिव शृंगलाले ३ वटा विद्यालय भवन समेत बनेका जानकारी दिए ।