बलात्कार मुद्दामा मुछिएका सिद्धबाबा भनिने कृष्णबहादुर गिरीलाई थुनामा राखेर नै मुद्दाको प्रक्रिया अघि बढाउन सर्वोच्च अदालतले आदेश दिएको छ ।

न्यायाधीशहरू आनन्दमोहन भट्टराई र प्रकाश ढुंगानाको इजलासले उच्च अदालत विराटनगरको आदेश सदर गरेको हो । साधनाका लागि भनेर आश्रममा बोलाएका गिरीले एक भक्तमाथि बलात्कार गरेको आरोपमा जिल्ला अदालतमा मुद्दा दायर भएको थियो ।

मुद्दाको सुनुवाइपछि सुनसरीका जिल्ला न्यायाधीश राधाकृष्ण उप्रेतीको इजलासले गिरीलाई ३ लाख रुपैयाँ धरौटीमा छाड्न गरेको आदेश उच्च अदालतले उल्ट्याएको थियो । उच्च अदालतको आदेशविरुद्ध गिरी सर्वोच्च अदालतमा आएका थिए । सर्वोच्चले उनको निवेदन अस्वीकृत गर्दै उच्च अदालतकै आदेश सदर गरेको हो । कान्तिपुर दैनिकमा खबर छ ।