काठमाडौं महानगरका प्रमुख विद्यासुन्दर शाक्यले तानसेन नगरपालिका र काठमाडौं महानगरको भित्री सहरी आचरण धेरै मिल्दाजुल्दा रहेको बताएका छन् । आइतवार तानसेन नगरको भ्रमण अवलोकनका क्रममा उनले यस्तो बताएका हुन्  । 

नगरको सभा कक्षमा आयोजना गरिएको परिचयात्मक कार्यक्रमलाई सम्बोधन गर्दै मेयर शाक्यले भने — ‘असन, मखन, ब्रह्मटोललगायत टोल काठमाडौं र तानसेन दुवै नगरमा छन् । यसको अर्थ दुई नगरबीच कुनै समयमा आत्मीय सम्बन्ध थियो भन्ने हो । सम्बन्ध औपचारिक मात्र हुँदैनन् । यो अनौपचारिक सम्बन्ध हाम्रा लागि प्यारो छ ।’ उनले त्यस क्रममा भने — ‘पाल्पा जिल्लाले प्रशासनको नेतृत्व गर्ने धेरै जनशक्ति उत्पादन गरेको छ । उहाँहरु काठमाडौंबाट नेतृत्व सम्हालिरहनुभएको छ । यस कोणबाट पनि दुई नगरबीचको सम्बन्धलाई हेर्न सकिन्छ ।’

मेयर शाक्यले काठमाडौंका अरु नगरले धेरै प्रशासनिक र विकास व्यवस्थापनलगायतका पक्षमा धेरै सिक्न सक्ने बताए । सडक, खानेपानी, भूउपयोग, सांस्कृतिक सम्पदाको संरक्षण र प्रवर्धनका पक्षमा कुरा गर्दैै उनले काठमाडौंको पूर्वाधार निर्माणमा के गल्ती थियो । त्यो हेरेर योजना तर्जुमा गर्न सकिने उनको भनाइ थियो । 

भेटका क्रममा तानसेनका नगरप्रमुख अशोककुमार शाहीले भने — ‘काठमाडौंले भाइ भनिँदिँदा तानसेनलाई गौरव लाग्छ । त्यसैले हामीले काठमाडौंलाई मितेरी साइनोका लागि अनुरोध गरेका छौं ।’ मेयर शाहीले नगर पहिचान बताउँदै संघीय प्रणालीमा स्थानीय सरकारलाई गोलमटोल गरेर हेर्न नहुने बताए । आकार र स्रोतका दृष्टिले साना हुनसक्छन् । तर साना नगरले पनि ठूला र दिगो महत्व राख्ने कार्यक्रम चलाएका छन् । तर अहिले स्थानीय सरकारलाई कमजोर मात्र देखाउने चरित्र बढेको छ । यो संघीयताका लागि पटक्कै राम्रो होइन ।’

टाढाबाट देखेका र टेलिभिजनमा हेरेर काठमाडौं नगरका प्रमुखलाई आफैंले स्वागत गर्न पाएको आफू खुशी भएको बताउँदै तानसेन नगरकी उपप्रमुख लक्ष्मीदेवी पाठकले सहरी विकासमा आफूहरु उत्साहित भएको बताए । 

भेटका क्रममा काठमाडौं महानगरकी उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, महानगरका प्रवक्ता ईश्वरमान डंगोल, दुवै नगरका वडाध्यक्षहरु र कार्यपालिका सदस्यहरुको सहभागिता थियो ।

भेटपछि पाल्पा दरबार र श्री ७ रणउजेरिश्वरी भगवती मन्दिर क्षेत्रका भ्रमण अवलोकन गरेर पुननिर्माणका विषयमा जानकारी लिइएको थियो । त्यस क्रममा पाल्पा जिल्लाका प्रमुख जिल्ला अधिकारी रमेश न्यौपाने मेयर शाक्य नेतृत्वको प्रतिनिधि मण्डललाई दरवार पुननिर्माणका विषयमा जानकारी गराएका थिए  । 

तानसेन २००७ सालमा गठन भएको नगरपालिका हो ।