इरानका शीर्ष आणविक वैज्ञानिक मोहसेन फखरिजादेहलाई इजरायलका हत्याराहरूले टाढाबाट नियन्त्रण गर्ने मशिनगन उपयोग गरेर हत्या गरेको इरानी स्रोतहरूको दाबीसहित बेलायती पत्रिका द डेली मेलले खबर दिएको छ । 

उक्त मशिन गन एउटा कारमा राखिएको र रिमोट कन्ट्रोल उपयोग गरेर त्यसलाई विस्फोट गराइएको तेहरान स्रोतले खबर दियो । 
 

फखरिजादेलाई निसानको पिकअपमा राखिएको उक्त बन्दूकले कम्तीमा तीनपटक प्रहार गरिएको र उनी पिकअप नजिक पुग्दा विस्फोट गरिएको अर्धसरकारी समाचार संस्था फार्स न्युज एजेन्सीले खबर दियो । 

सोमवार मृतक वैज्ञानिकको अन्त्येष्टि सम्पन्न गरिएको छ । देशको आणविक कार्यक्रमका पिता मानिने फखरिजादेको हत्याको बदला लिने भनी इरानी नेताहरूले प्रतिज्ञा गरिरहेका छन् । 

शनिवार इरानका सर्वोच्च नेता आयातोल्लाह खमेनीका सल्लाहकारले चलाउने कट्टरपन्थी पत्रिकाले प्रतिशोधका रूपमा इजरायलको बन्दरगाह शहर हाइफामा आक्रमण गरी व्यापक मानव हताहती गराउन आह्वान गरेका थिए । 

इरानको नेतृत्वमा रहेका केही व्यक्तिले फखरिजादेको हत्याका लागि इजरायललाई जिम्मेवार ठहर्‍याएका छन् । इजरायलले हत्याको जिम्मेवारी लिएको छैन ।