नेपाल कम्युनिस्ट पार्टी (नेकपा)का प्रवक्ता नारायणकाजी श्रेष्ठले जनताद्वारा विस्थापित शक्तिलाई फेरि पुनस्र्थापना हुने सपना नदेख्न सुझाव दिएका छन् ।

लोकतन्त्रलाई सुदृढ गर्ने क्रममा केही कमजोरी देखिए पनि त्यसलाई सच्याउन राजनीतिक दलहरू सक्षम रहेको उनको भनाइ छ । 

प्रधानमन्त्री निवास बालुवाटारमा बुधवार बसेको नेकपा सचिवालय बैठकपछि पत्रकारहरूले राखेको एक प्रश्नको जवाफमा प्रवक्ता श्रेष्ठले प्रतिगामी शक्तिले प्रतिगमनको सफलता नसोचे हुने बताएका हुन् । 

‘प्रतिगामी शक्तिले प्रतिगमनको सफलता नसोचे हुन्छ । लोकतन्त्रलाई सुदृढ गर्ने क्रममा केही कमजोरी भएका छन् भने त्यसको समीक्षा गरी अगाडि बढ्छौं,’ श्रेष्ठले भने, ‘तर जनताद्वारा विस्थापित शक्तिले पुनःस्थापना हुने सोच नराखे हुन्छ ।’

पछिल्ला दिनमा देशका विभिन्न स्थानमा पूर्वराजावादीहरूले प्रदर्शन गरिरहेका छन् । ती प्रदर्शनलाई राजनीतिक दलको असफलतासँग जोडेर सामाजिक सञ्जालमा टीकाटिप्प्णी भइरहेको छ ।