नेपाल कम्युनिस्ट पार्टी (नेकपा)का उपाध्यक्ष वामदेव गौतमले तिक्ततातर्फ जान लागेको पार्टीको आन्तरिक अवस्था मित्रतातर्फ फर्काउने कोशिश भएको बताएका छन् । प्रधानमन्त्री निवास बालुवाटारमा मंगलवार बसेको सचिवालय बैठकपछि लोकान्तरलाई संक्षिप्त प्रतिक्रिया दिँदै विवाद मित्रताउन्मुख भएको बताएका हुन् ।

‘तिक्ततातर्फ जान लागेको पार्टीको आन्तरिक अवस्था मित्रतातर्फ फर्काउने कोशिश भएको छ । आजको केन्द्रीय सचिवालय बैठकको सार यही हो,’ गौतमले लोकान्तरसँग भने ।

मंगलवारको बैठकमा अध्यक्षद्वय प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डले पेश गरेका प्रतिवेदनमाथि औपचारिक छलफल शुरु भएको छ । 

मंगलवारको सचिवालय बैठकमा सहमतिका लागि अनौपचारिक छलफल गर्ने समेत सहमति भएको प्रवक्ता नारायणकाजी श्रेष्ठले पत्रकारहरुलाई बताएका थिए । पार्टीको विवाद जटिल मोडमा पुगेको समयमा उपाध्यक्ष गौतमले ‘तिक्ततातर्फ जान लागेको पार्टीको आन्तरिक अवस्था मित्रतातर्फ फर्काउने कोशिश भएको’ भनी दिएको प्रतिक्रियालाई निकै महत्वका साथ हेरिएको छ । 

गत कात्तिक २८ गते बसेको सचिवालय बैठकमा प्रचण्डले प्रधानमन्त्री ओलीको कार्यशैलीप्रति विमति जनाउँदै सचिवालयमा दस्तावेज पेश गरेका थिए । मंसिर १३ गते बसेको बैठकमा ओलीले प्रचण्डलाई ५३ बुँदे जवाफ सहितको प्रतिवेदन पेश गरेका थिए । 

जवाफी प्रतिवेदनमा ओलीले प्रचण्डले राखेको प्रस्ताव सचिवालयले खारेज गरेर भदौ १६ को सहमतिमा फर्किनुपर्ने बताएका छन् । एक अर्कोलाई आरोपित गरेर सचिवालयमा दुई अध्यक्षका प्रस्ताव आएपछि नेकपा विवाद जटिल मोडमा पुगेको विश्लेषण भइरहेको छ । 

मंगलवारको बैठकमा बोल्ने अधिकाशं नेताले विवाद सहमतिमा समाधान गर्नुपर्ने धारणा राखेका थिए । नेकपा सचिवालयको अर्को बैठक भोलि बुधवार पुनः बस्दैछ । त्यसअघि नेताहरुबीच अनौपचारिक छलफलको तयारी भएको नेकपा स्रोत बताउँछ ।

नेकपा स्थायी कमिटी बैठक १८ र केन्द्रीय कमिटी बैठक मंसिर २५ देखि काठमाडौंमा शुरु हुँदैछ । नेकपा प्रवक्ताले १८ गतेका लागि निर्धारित स्थायी कमिटीको बैठक तोकिएको मितिमै बस्ने बताएका छन् ।