काठमाडौं महानगरपालिकाले देशभरका नगरपालिकाहरुसँग भगिनी सम्बन्ध स्थापित गर्ने अभियान थालेको छ । काठमाडौंले महानगरपालिकाले बिहीबार जुम्लाको चन्दननाथ नगरपालिकासँग पनि सम्बन्ध स्थापित गर्ने विषयमा छलफल गरेको छ । 

चन्दननाथकी मेयर कान्तिका सेजुवालसँगको भेटमा काठमाडौं महानगरप्रमुख विद्यासुन्दर शाक्यले देशैभरीका नगरहरुसँग भगिनी सम्बन्ध स्थापित गर्ने अभियान थालेको बताएका छन् । 

उनले संघीयतालाई मजबुत बनाउन आफूले राष्ट्रिय तथा अन्तर्राष्ट्रिय नगरहरुसँग सम्बन्ध बनाउन लागेको बताए । शाक्यसँग भेटका लागि सेजुवाल प्रशासकिय अधिकृतसहित राष्टिूय सभागृहमा पुगेको काठमाडौं महानगरपालिकाले जनाएको छ । 

भेटमा काठमाडौंका मेयर शाक्यले चन्दननाथसँग भगिनी सम्बन्धका लागि निर्णय भइसकेको बताउँदै विविधताभित्रका समानता, पर्यटन र पर्यावरणीय सम्बन्ध अघि बढाउने बताए । 

‘काठमाडौँमा धेरै मूर्त तथा अमूर्त सांस्कृतिक, सम्पदा छन् । मानव निर्मित सम्पदाले धनी काठमाडौँ सांस्कृतिक सहर र कर्णालीको दुर्गम नगरपालिका चन्दनथानबीच भगिनी सम्वन्ध स्थापना गर्ने कुरा आफैंमा सकारात्मक छ । प्रकृति र पर्यावरणको समुचित सन्तुलन बिना मानव समाजको अस्तित्व नै संकटमा पर्नसक्ने कुरालाई मनन गर्दै दिगो र नतिजामुखी साझेदारी गर्न चाहेका छौं’, मेयर शाक्यले भने । 

काठमाडौँ महानगरपालिकाले अन्तर्राष्टिय स्तरमा पनि १६ वटा नगरसँग भगिनी सम्वन्ध स्थापना गरिसकेको छ । पाकिस्तानको इस्लामावाद र थाइल्याण्डको बैंकक प्रक्रियामा छन् ।

अन्तर्राष्ट्रिय  सम्बन्धसँग देशभित्रकै पालिकासँगको सम्बन्धको विषय जोड्दै मेयर शाक्यले, संघीयतालाई सार्थक र थप बलियो बनाउन अन्तर पालिका भगिनी सम्बन्धले टेवा पुग्ने अपेक्षा व्यक्त गरे । 

चन्दननाथसँग सम्वन्ध स्थापनापछि जुम्लामा उत्पादिन बहुमुल्य जडीबुटी, स्याउ, सिमी, ओखरलगायतका प्रागंरिक कृषि उत्पादनको बजारीकरण, व्यवस्थापनमा सहकार्य हुनेछ । रारा, सेफोक्सुण्डो जस्ता ताल जाने बाटोमै रहेकोले चन्दननाथ र काठमाडौंको धार्मिक पर्यटनलाई जोड्न सकिने उनले बताए । 

भेटका क्रममा चन्दनथान नगरकी प्रमुख कान्तिका सेजुवालले, देशभित्रका नगरको सीप नक्कल गर्दा कार्यान्वयन योग्य हुने बताइन् । ‘विदेशी सिको गर्न खोज्दा ढंग नपुगेर धेरै श्रोत र योजना खेर गएका छन् । त्यसैले हामीले हाम्रै राजधानी शहर काठमाडौैं महानगरपालिकासँग भगिनी सम्वन्ध स्थापना गर्न पहल गरेका हौं,’ सेजुवालले भनिन् ।