सोमवार अमेरिकी इलेक्टोरल कलेजको मतपरिणाम घोषणा हुँदै गर्दा राष्ट्रपति डोनल्ड ट्रम्पले महान्यायाधिवक्ता विलियम बारलाई बर्खास्त गरेका छन् । 
 

क्रिसमसको बिदापछि बारले डिपार्टमेन्ट अफ जस्टिसको नेतृत्व नगर्ने घोषणा ट्रम्पले गरे । 

ट्रम्प र बारले हालैका हप्तामा शाब्दिक युद्ध गरेका थिए । बार राष्ट्रपति–निर्वाचित जो बाइडनका छोरा हन्टरमाथिको अनुसन्धानमा मौन रहेको अनि नोभेम्बर ३ मा भएको निर्वाचनमा व्यापक धाँधली भएको कुनै प्रमाण फेला नपरेको भनेकाले उनीसँग ट्रम्प असन्तुष्ट थिए । 

सोमवार अपराह्न अमेरिकाको इलेक्टोरल कलेजका प्रतिनिधिहरूले मत दिएर बाइडनको जीतलाई औपचारिकता दिएपछि ट्रम्पले बारलाई निकालेको भनी ट्वीट गरेका थिए । 
 

उपमहान्यायाधिवक्ता जेफ रोजेनले बारको ठाउँ लिनेछन् र रोजेनको ठाउँमा रिचर्ड डोनोग्वे आउनेछन् । 

बारले ट्रम्पलाई लेखेको पत्रमा राष्ट्रपतिको रूपमा ट्रम्पको चार वर्षको अवधि अत्यन्त सफल रहेको उल्लेख गरे जबकि उनी आफैं आधा अवधि मात्र महान्यायाधिवक्ता रहेका थिए । 

चुनाव हारेदेखि अहिलेसम्म ट्रम्पले रक्षामन्त्री र साइबर सुरक्षा प्रमुख लगायतका अधिकारीलाई बर्खास्त गरिसकेका छन् ।