शहरी विकास मन्त्री कृष्णगोपाल श्रेष्ठ र भौतिक योजना तथा यातायात मन्त्री वशन्त नेम्वाङले चन्द्रागिरी नगरपालिकाको विकास निर्माणको योजनाको अवलोकन गरेका छन् । 

दुवै मन्त्रीले शुक्रबार निर्माणाधिन अवस्थामा रहेको तीनथाना र किर्तिपुर जोड्ने निर्माणाधिन पुल र चन्द्रागिरी नगरपालिका–१५ निर्माणाधिन भेराडिल खाइके साकुरा पार्कको अवलोकन गरेका छन् । 

अवलोकनको क्रममा दुवै मन्त्रीले एक वर्षदेखि सुस्त भैरहेको तीनथाना–किर्तिपुर जोड्ने पुलको निर्माण द्रुत गतिमा गर्न निर्देशन दिएका थिए । सो अवसरमा निर्माण कम्पनीका प्रतिनिधि र आयोजनाका इन्जिनियरले यो वर्षको अन्त्य सम्ममा पुलको निर्माण भैसक्ने बताएका थिए । 

मन्त्री नेम्वाङले कुनैपनि बहानाबाजी नगरी यो वर्षको अन्त्यसम्मका सिलान्यास गर्नेगरी तयार गर्न निर्देशन दिनुभएको थियो । शहरी विकासमन्त्री श्रेष्ठले नयाँ वर्षसंगै पुलको शिलान्यास भैसक्नेगरी तयार गर्न निर्देशन दिए । 

वि.सं. २०७८ साल अघि उद्घाटन गर्नेगरी द्रुतगतिमा काम शुरु गर्नुस, कामदार कम देखिएको छ जुनसुकै हालतमा यो वर्षे नकटाउनुस–निर्देशन दिने क्रममा मन्त्री श्रेष्ठले भने । 

दुवैमन्त्रीले सरकारले शुरु गरेको विकास निर्माणको कामलाई द्रुत गतिमा अघि बढाउन निर्देशन दिएका थिए । ‘कुनै बहाना बनाउन पाइदैन, तोकिएकै समयमा पुल निर्माण गर्नैपर्छ–निर्देशन दिने क्रममा दुवै मन्त्रीको एउटै स्वर थियो । उनीहरुले नया वर्षमा तीनथाना र किर्तिपुरका बाटोमा मोटर गुड्नुपर्ने बताएका थिए ।

पार्कको अवलोकन गदै मन्त्रीद्धयले यस्तो भीरालो र डरलाग्दो स्थानमा पार्कनिर्माण गरेर वडा र स्थानीयले साहसी काम गरेको बताए । 

भीराला र पहिरोजाने क्षेत्रलाई व्यवस्थित गरी २७ रोपनी क्षेत्रफलमा निर्माण गरिएको पार्क चन्द्रागिरी नगरपालिका–१५ वडाको गौरबको योजना भित्र पर्छ । पार्कको बारेमा जानकारी गराउदै वडा अध्यक्ष उत्तमबहादुर रावतले यो पार्कको गुरुयोजना तयार गरी थप विकास गर्नुपर्ने बताए  । उनले भने,‘यहा जापानबाट ल्याइएको ५० वटा साकुरा फूलका बोट छन् ।’

‘ढुंङ्गे भीरलाई व्यवस्थित गरी बुढादेखि बच्चा सम्मलाई हुनेगरी व्यवस्थित बस्ने र खेल्ने क्षेत्रको विकास गरेका छौ । अब पार्कको विकास गर्न योजना तयार गरी बजेट व्यवस्थापन गर्न आग्रह गरेका छौं,’ मन्त्रीद्धयसंग पार्कको विषयमा जानकारी गराउदै अध्यक्ष रावतले भने  । 

अवलोकन भ्रमणमा शहरी विकास मन्त्रालयका सचिव डा. रमेश प्रसाद सिंह, वागमती सभ्यता एकिकृत विकास समितिका कार्यकारी अधिकृत नवराज प्याकुरेल  सहितको मन्त्रालयको उच्च स्तरीय टोली सहभागि भएका थिए ।

पार्कभित्र जिपल्याण्ड,स्पाइरल स्टेयर,थियटर, मिनिरेल लगायतका मनोरञ्जनका सामाग्री तयारीगर्ने क्रममा रहेको अध्यक्ष रावतको भनाइ थियो । 

शहरी विकास मन्त्री श्रेष्ठले वडा अध्यक्ष र सबै वडावासीको अथक प्रयासले चन्द्रागिरीमा आकर्षित पार्क निर्माण हुन सकेको बताउदै थप विकास आवश्यक रहेको बताए । भौतिक योजना मन्त्री नेम्वाङले सुन्दर पार्कलाई थप विकास गर्न सरकारले सहयोग गर्ने बताए । 

विष्णुदेवी मन्दीरको विकास निर्माण र गुरुयोजनाको विषयमा छलफल गर्न शहरी विकास मन्त्रालयका सचिव र उच्च स्तरीय टोली सहित विष्णुदेवी मन्दीर परिसर पुगेका मन्त्री श्रेष्ठले ऐतिहासिक विष्णुदेवी मन्दीरको गुरुयोजना तयार गरी विकास निर्माणको कामलाई अघि बढाउनुपर्ने बताए । उनले भने, ‘यो धार्मिक र सांस्कृतिक क्षेत्रलाई व्यवस्थित  रुपिमा विकास गर्नु आवश्य छ ।’ 

खोलाको दोभान, घाट, ड्याम निर्माण लगायतका विषय समेटेर गुरुयोजना बनाइ अघि बढ्नुपर्ने उनको भनाइ थियो । 

मन्त्रालयका सचिव डा. सिहले एतिहसिक विष्णुदेवी मन्दीर क्षेत्रको डिपिआर तयार गरी विकास निर्माण र योजनाका कामलाई क्रमबद्ध रुपमा अघि बढाईने बताए । उनले भने,‘पार्क र खोला किनाराको समेत योजना बनाएर विकास गर्नेछौ । पार्कको तत्काल योजना बनाएर कार्यान्वयन चरणमा जानेछौँ ।’

मन्त्री श्रेष्ठले तीनथाना गढी र बुद्धपार्कको निरीक्षण गरी सबै क्षेत्रलाई व्यवस्थित रुपमा विकास गर्ने प्रतिबद्धता जनाएका थिए । 

उनले चन्द्रागिरी नगरपालिका १५ वडाका गौरब र अन्य योजनाको बारेमा जानकारी लिएपछि अवलोकनमा गएका थिए ।