यातायात व्यवस्था कार्यालय कैलालीले चालू आर्थिक वर्षको हालसम्म ३४ करोड रुपैयाँभन्दा बढी राजस्व संकलन गरेको छ ।

सवारीकर, आयकर, सवारी चालक अनुमतिपत्र, नवीकरण जाँचपास, रुट परमिट, प्रदूषण, कम्पनी रजिस्ट्रेसन लगायतका विभिन्न प्रकारका राजस्व शीर्षकबाट ३४ करोड ३५ लाख ८८ हजार ४१३ रुपैयाँ राजस्व संकलन गरेको यातायात व्यवस्था कार्यालयका निमित्त प्रमुख लक्ष्मण शाहले जानकारी दिए ।

चालू आवको असोजमा सबैभन्दा बढी १३ करोड ८१ लाख ७ हजार ६४३ रुपैयाँ र सबैभन्दा कम मंसिरमा ५ करोड ३८ लाख ३ हजार ४९२ संकलन भएको प्रमुख शाहले बताए । भदौमा १० करोड ३६ लाख ७६०, कात्तिकमा ९ करोड १५ लाख ५० हजार १०८ र साउनमा ५ करोड ७० लाख ५६ हजार ४१० संकलन भएको छ । 

विक्रम संवत् २०७४ देखि स्मार्ट लाइसेन्स वितरण कार्य शुरू गरेको यातायात व्यवस्था कार्यालय कैलालीले हालसम्म ३८ हजार ५० जनालाई स्मार्ट लाइसेन्स वितरण गरिसकेको जनाएको छ । स्मार्ट कार्डका लागि कार्यालयमा अहिलेसम्म ५५ हजार ४५६ जनाको आवेदन परेको कार्यालय प्रमुख शाहले बताए ।

४६ हजार ९६१ वटा स्मार्ट कार्ड प्रिन्ट भइसकेको र ५ हजार ४२५ प्रिन्ट हुन बाँकी रहेको उनले बताए । ८ हजार ९११ स्मार्ट कार्ड कार्यालयमा आई वितरण गर्न बाँकी रहेको बताइएको छ ।

कार्यालयमा हालसम्म विभिन्न किसिमका निजी, भाडाका, सरकारी, संस्थागत लगायतका सवारीसाधन गरी १ लाख २४ हजार ७०० बस, ट्रक, टिप्पर, जेसीबी, कार, डेलिभरी भ्यान, ट्रयाक्टर, पावरटिलर, स्कुटी, मोटरसाइकल, इ–रिक्सा दर्ता भएको बताइएको छ ।