चीनसँग लामो समयदेखि सीमाविवाद चलिरहेको सन्दर्भमा उसलाई सन्देश दिन भारतले दक्षिण चीन सागरमा भियतनामसँग संयुक्त जलसेना अभ्यास गर्ने भएको छ । 

भारतका जलसेना अधिकृतहरूका अनुसार, शनिवार र आइतवार भारत र भियतनामबीच सम्पर्क तथा सहयोगसम्बन्धी अभ्यास हुनेछ । 

भारतीय जलसेनाको आईएनएस किल्टन नामक जहाजले मध्य भियतनाममा बाढी प्रभावित मानिसहरूलाई राहत सामग्री लिएर गएको छ । फर्किंदा ऊ यस अभ्यासमा सहभागी हुनेछ । 

भारतको रक्षा मन्त्रालयले आईएनएस किल्टनले १५ टनभन्दा बढी राहत सामग्री लिएर बिहीवार हो ची मिन्ह शहरको ना रंग बन्दरगाह पुगेको छ । त्यहाँबाट निस्केर जहाज २६ र २७ डिसेम्बरमा दक्षिण चीन सागरमा भियतनामी जलसेनासँग सम्पर्क र सहयोग सम्बन्धी अभ्यासमा भाग लिने भएको छ । 

चीनले दक्षिण चीन सागरमा सैन्य उपस्थिति बढाइरहेको बेलामा यो अभ्यास हुनु अर्थपूर्ण रहेको विश्लेषकहरू बताउँछन् । उक्त क्षेत्रमा चीनले कृत्रिम टापुहरू बनाएर लडाकू जेट र क्षेप्यास्त्र तैनाथ गरेको छ ।