अर्थमन्त्री एवं नेकपा महासचिव विष्णु पौडेलले आगामी जेठ महिनाको पहिलो सातासम्ममा नयाँ जनादेश अनुसारको सरकार बन्ने बताएका छन् । 

प्रतिनिधि सभा पुनःस्थापनाको सम्भावना नरहेको र चुनाव अहिलेको एकमात्र राजनीतिक निकास भएको उनले बताए । 

नेकपा रूपन्देही जिल्लाका अगुवा कार्यकर्ता भेलालाई आइतवार बुटवलमा सम्बोधन गर्दै महासचिव पौडेलले चुनाव हुन्छ कि हुँदैन भनेर अलमलमा नबस्न कार्यकर्तालाई निर्देशन समेत दिए ।

‘निर्वाचन हुन्छ कि हुँदैन भनेर नसोध्नुस् । कुरा बुझ्ने राजनीतिक दलहरू चुनावमा लागिसके । निर्वाचन आयोग चुनाव गराउन तयार छ, पार्टीहरू चुनावको तयारीमा छन्, आर्थिक स्रोत जोहो गर्न अर्थ मन्त्रालय तयार छ,’ अर्थमन्त्री समेत रहेका पौडेलले भने, ‘वैशाख १७ र २७ गते चुनाव हुन्छ । मतगणना सकिएर जेठको पहिलो हप्तासम्ममा नयाँ जनादेशका आधारमा सरकार बनाएर गतिशील ढंगले सरकार सञ्चालन हुन्छ ।’ 

आफूहरूले स्वतन्त्र न्यायालय र शक्तिपृथकीकरणको सिद्धान्तमा विश्वास गर्ने भएपनि प्रतिनिधि सभा पुनःस्थापनाको सम्भावना नरहेको जिकिर उनले गरे ।

‘प्रतिनिधि सभा विघटनको मुद्दा सर्वोच्चको संवैधानिक इजलासमा विचाराधीन छ, अदालतको निर्णयलाई हार्दिकतापूर्वक स्वीकार गर्छौं, यो निष्ठाको विषय हो,’ पौडेलले भने, ‘तर हामी पनि संविधान र कानून निर्माता भएकाले अलिअलि बुझ्छौं । प्रतिनिधि सभा पुनःस्थापनाको संवैधानिक आधार छैन । ६४ प्रतिशतको समर्थन लिएर प्रधानमन्त्री बन्दा त प्रतिनिधि सभाले समस्यको समाधान गरेन, अल्पमतले गर्न सक्छ ? बहुमतको विकल्पमा अल्पमत छ, त्यसले सरकार गठन गर्न सक्दैन ।’

महासचिव पौडेलले आसन्न निर्वाचनमा आफूहरूले दुईतिहाइ बहुमत ल्याउने दाबी गरे ।

‘हिजोको जस्तो होइन अनुशासित प्रतिनिधि सभा दिनुस् भनेर जनतामा जान्छौं, बहुमत होइन दुईतिहाइ बहुमत ल्याउने गरी चुनावमा जान्छौं,’ पौडेलले भने । 

महासचिव पौडेलले केन्द्रमा असर देखिएपनि नेकपा विभाजनको प्रभाव रुपन्देहीमा नपरेको बताए ।