हिमाली क्षेत्रमा कोभिड–१९ को संक्रमण नदेखिएपछि पाहुनाको सेवाका लागि स्थापित पर्यटकीय होटल तथा लज पुनः सञ्चालनमा आएका छन् ।

बाह्य पर्यटकको आगमन बन्द भए पनि पछिल्लो समय फाट्टफुट्ट रूपमा आन्तरिक पर्यटक आउन थालेकाले लामो समय बन्द रहेको पर्यटकीय एवं व्यापारिक मार्गका होटल तथा लजले आफ्ना नियमित सेवा दिन थालेका हुन् । 

धुञ्चेदेखि लाङटाङ तथा गोसाइँकुण्ड, तामाङ सम्पदामार्ग, नेपालको उत्तरी नाकाको रसुुवागढी लगायत हेलम्बु, डाडेपाटी लगायतका स्थानमा सञ्चालित करीब २०० पर्यटकीय होटल तथा लज पुनः सञ्चालनमा आइसकेको होटल तथा पर्यटन व्यवसायी संघ रसुवाका अध्यक्ष निशान उपनामले परिचित रामशरण गजुरेलले जानकारी दिए ।

हिमाली जिल्ला रसुवामा कोरोनाको खासै प्रभाव नपरेको र पर्यटकीय क्षेत्रको बढी हिस्सा ओगटेको गोसाइँकुण्ड गाउँपालिकाभित्र रहेका निजी तथा सरकारी विद्यालयले समेत बालबालिकाकोे नियमित पठनपाठन निर्वाधरूपमा पुनः सञ्चालन गराइसकेकाले रोगप्रति आशंका गर्ने ठाउँ नभएको होटल तथा पर्यटन व्यवसायी संघले स्पष्ट पारेको छ ।
        
पर्यटकका लागि सेवा दिन अहोरात्र तल्लीन व्यवसायीले कोरोनाको संक्रमण शुरू भएयता मासिक ६ करोड ७० लाख रुपैयाँ घाटा व्यहोर्दै जानुपरेको अवस्थामा पाहुनाको आगमनले केही आशा पलाउँदै गएको होटल तथा लज सञ्चालकले बताएका छन् । 

कोरोनाको असरले यस भेकमा पर्यटनसँग जोडिएका ७० भन्दा बढी पथ प्रदर्शक एवं करीब ४०० मजदुर समेत बेरोजगार बन्न पुगेको संघका पदाधिकारीले निचोड निकालेका छन् ।

माओवादी द्वन्द्व र विक्रम संवत् २०७२ सालको विनाशकारी भूकम्पभन्दा अहिलेको कोरोनाको असरले पर्यटन व्यवसायी जटिल रूपले धरासायी मोडमा पुगेको उनीहरूको ठूलो गुनासो बढेको पाइन्छ । १०० को हाराहारीमा रहेका ससाना साधारण होटल पनि कोरोनाको असरले ठूलो मर्कामा परेका छन् ।
          
व्यवसायमार्फत पर्यटकलाई प्रदान गरेको सेवाबाट प्राप्त आयले बालबालिकालाई गुणस्तरीय शिक्षा दिलाई जीविकोपार्जनमा सरलता ल्याउने ठूलो अभिलाषाका साथ होटल तथा लज सञ्चालनका लागि बैंक तथा वित्तीय संस्था र गाउँघरका साहुबाट लिइएका ऋणको साँवा तथा ब्याजका किस्ता समेत तिर्ने उपाय नभएको होटल तथा पर्यटन व्यवसायी संघले जनाएको छ ।
         
पाहुनालाई खाने–बस्ने सुविधा पुर्‍याउन भाडामा घर लिने व्यवसायीले मासिक ५० हजारदेखि डेढ लाखसम्म घरधनीलाई तिर्नुपर्ने बाध्यता भएकाले आन्तरिक पर्यटनको प्रवद्र्धनलाई बढावा दिन माग गरिएको लाङटाङका व्यवसायीले बताएका छन् । काबुभन्दा बाहिरको परिस्थितिले उत्पन्न गराएको आर्थिक संकट समाधान गर्न राहत वा निश्चित अवधिका लागि निब्र्याजी ऋण उपलब्ध गराई नेपालको दोस्रो पर्यटकीय क्षेत्रका व्यवसायीलाई उत्थान गरिदिन सरकारसमक्ष आग्रह गरिएको संघका अध्यक्ष गजुरेलले बताए ।

पर्यटकको आगमन बन्द भएपछि कृषि तथा फलफूलका साथै करेसाबारीमा सागसब्जी उत्पादन गराउने, चौंरी पालेर दुग्ध उत्पादन गर्ने किसान समेत ठूलो मर्कामा परेका छन् ।