स्याङ्जा घर भएकी १ महिलाले धरान उपमहानगरपालिका–९ को वासिन्दा बनेर झूटो विवरण पेश गरी नागरिकता लिएको पाइएको छ ।

स्याङ्जाको वालिङ–३ घर भएकी मञ्जु क्षेत्रीले विक्रम संवत् २०७५ माघ ८ गते धरान–९ बाट नागरिकता लिएको पाइएको हो ।

उनलाई अर्घाखाँचीका गोपाल सेजुवालले बुवा बनेर नागरिकता दिलाएको पाइएको प्रहरीले जनाएको छ । वडाध्यक्ष रत्न कटवाललाई झुक्काएर ती सुजुवालले धरान–९ को वासिन्दा र मञ्जु आफ्नो छोरी भएको कागज बनाएर सिफारिस लिएको पाइएको छ ।

स्याङ्जा प्रहरीले ती महिलालाई पक्राउ गरेपछि यस्तो रहस्य सार्वजनिक भएको हो । वडा नम्बर ९ का वासिन्दा बनेर मञ्जुलाई नागरिकता दिलाएका सेजुवाल हाल जापानमा रहेका छन् । छोरी बनाएर जापान लान उनले मञ्जुको नागरिकता बनाएको खुलेको छ ।

इलाका प्रहरी कार्यालय धरानका प्रहरी नायब उपरीक्षक ज्ञानेन्द्रबहादुर बस्नेतका अनुसार झूटा विवरण पेश गरेर नागरिकता निकालिएको कारण ठूलो रकम खर्च गरेको हुनसक्ने बताए । ती महिला पक्राउ परेपछि स्याङ्जा प्रहरीले नागरिकता सिफारिस गर्ने धरान–९ का वडाध्यक्ष रत्न कटवाललाई पनि अनुसन्धानको दायरामा ल्याउन इलाका प्रहरी प्रहरी कार्यालयसँग समन्वय गरेको प्रहरी नायब उपरीक्षक बस्नेतले जानकारी दिए ।

यस विषयमा वडाध्यक्ष रत्न कटवाललाई सोधपुछ गर्ने तयारी गरिएको प्रनाउ बस्नेतले जानकारी दिए । ‘हामी उहाँसँग सम्पर्क गर्न खोजिरहेका छौं,’ प्रनाउ बस्नेतले भने, ‘अर्घाखाँचीको सेजुवालले सुनसरीबाट नागरिकता बनाइदिन्छु भनेर ल्याएछन् । यहाँ झुट्टा विवरण पेश गरेर नागरिकता बनाइएको पाइयो, थप कुरा अध्यक्षसँग सम्पर्क गरेपछि खुल्नेछ ।’

अनुसन्धानको क्रममा नागरिकता धरानबाट झिकेको खुलेपछि स्याङ्जा प्रहरीले पक्राउ परेकी महिलासहित यो मुद्दा जिल्ला प्रहरी कार्यालय सुनसरीमार्फत धरान प्रहरीलाई जिम्मा दिएको छ । ती महिला ३४ वर्षकी भएको खुलेको तर विक्रम संवत् २०५५ सालको जन्मदर्ता गरेर २ वर्षअघि २० वर्ष उमेरको नागरिकता लिएको पाइएको छ । जापानमा रहेका सेजुवालसँग फेसबूकमा चिनजान भएको र छोरी बनेर जापान जाने भनेर धरानबाट नागरिकता निकालेको हालसम्मको प्रहरी अनुसन्धानबाट खुलेको प्रहरी नायब उपरीक्षक बस्नेतले जानकारी दिए ।

सेजुवल २ वर्षअघि जापानबाट नेपाल आएर धरान–९ को वासिन्दा भई मञ्जुलाई नागरिकता निकालिदिएको खुलेको छ ।