अमेरिकाको राजधानीमा बुधवार संसद् भवनमा मच्चाइएको ताण्डवका लागि राष्ट्रपति डोनल्ड ट्रम्प नै जिम्मेवार ठहर्‍याइएका छन् । 

द हिल पत्रिकामा प्रकाशित एक समाचारअनुसार, यस घटनालागि ट्रम्प जिम्मेवार रहेको भनी २०० भन्दा बढी सांसदले ट्रम्पमाथि महाभियोग लगाउनुपर्ने वा संविधानको २५औं संशोधनमार्फत हटाउनुपर्ने बताउँदै आएका छन् । 
 

यूएसए टुडेको एक समाचारमा उल्लेख भएअनुसार, अमेरिकी अनुसन्धान एजेन्सीहरूसँग ट्रम्पको उत्तेजक भाषणपछि नै हिंसा भड्किएको विषयमा दह्रो प्रमाण छ । 
 

कोर्नेल ल इन्स्टिच्युटका प्राध्यापक डेभिड ओह्लिनले भने, ‘ट्रम्प नै हिंसाका लागि जिम्मेवार छन् । उनले अपराध गरेका हुन् र उनीमाथि मुद्दा चलाउनुपर्छ ।’

कार्यवाहक महान्यायाधिवक्ता माइकल शेरविनले घटनाका लागि जिम्मेवार व्यक्तिहरूलाई माफी नदिइने बताए । 

तर ट्रम्पसँग दुईवटा विकल्प छन् । पहिलो, राष्ट्रपतिका रूपमा आफूले गरेको कुनै पनि गल्तीलाई उनी आफैंले माफ गर्न सक्छन् । दोस्रो, माफी पाएनन् भने पनि मुद्दा लम्बिन्छ र कानूनी छिद्र खोजेर उनी उम्किन सक्छन् । 

उनले गरेको भाषणपछि नै समर्थकहरूले संसद् भवनमा उपद्रो मच्चाएका त हुन् तर उनले भाषणमा हिंसा गर भनेकै चाहिँ हैनन् । त्यसैले यसै विषयमा उनी जेल गइहाल्ने सम्भावना त्यति देखिँदैन । 
 

बुधवारको घटनालाई उपराष्ट्रपति माइक पेन्सले अमेरिकी इतिहासको कालो दिन भने । उनले ट्रम्प समर्थकहरूलाई झपारे । 

तर ट्रम्पलाई महाभियोग लगाएर वा संविधानको २५औं संशोधनमार्फत हटाउने पक्षमा पेन्स देखिँदैनन् । यसो गर्दा रिपब्लिकन पार्टीको इज्जतमा धक्का लाग्ने उनको आकलन छ । 

अनि चार वर्षपछि हुने चुनावमा शायद पेन्स राष्ट्रपति पदका लागि लड्न सक्छन् । अहिले उनले ट्रम्पविरुद्ध केही कदम चालेमा पार्टीभित्र ट्रम्प समर्थकहरूको विरोधको सामना गर्नुपर्ने हुन सक्छ ।