अमेरिकाको संसद् भवनमा अघिल्लो साता गरिएको आक्रमणपछि केही चिनियाँ बुद्धिजीवीहरूले ३० वर्ष पुरानो एक पुस्तक खोजी गरिरहेका छन् । 

अंग्रेजीमा ‘अमेरिका अगेन्स्ट अमेरिका’ शीर्षक भएको उक्त पुस्तकमा अमेरिका देशभित्रकै द्वन्द्वका कारण पतनको बाटोमा जाने भनी भविष्यवाणी गरिएको थियो । 

पुस्तक कम्युनिस्ट पार्टीका पाँचौं दर्जाका नेता वाङ हुनिङले लेखेका थिए । उनी तीनजना चिनियाँ राष्ट्रपतिका वरिष्ठ राजनीतिक सल्लाहकार थिए । 

किताब अहिले १६ हजार ६०० युआनभन्दा बढी मूल्यमा मारामार बिक्री भइरहेको छ । 

सन् १९९१ मा प्रकाशित हुँदाको पुस्तकको मूल्यभन्दा यो तीन हजार गुणा बढी हो । 

‘अमेरिकामा नागरिक शीतयुद्धको स्थिति रहेकाले उक्त देशलाई बुझ्नका लागि यस पुस्तकप्रतिको आकर्षण बढेको हो,’ रेनमिन विश्वविद्यालयमा चोङयाङ इन्स्टिच्युट फर फाइनान्सियल स्टडीजका कार्यकारी डीन वाङ वेनले बताए । ‘हालै भएका घटनापछि अमेरिकाका विषयमा चीनका शंकाहरू थप चर्किनेछन् ।’

संसद् भवनमा गरिएको आक्रमणलाई बेइजिङले अमेरिकाको सामाजिक चिराका कारण गलत परराष्ट्रनीति बनिरहेको भनी बुझेको छ । त्यसैले जो बाइडन राष्ट्रपति बनेपछि पनि व्यापार र अन्य राजनीतिक विवाद समाधान हुने विषयमा चीनले शंका गरिरहेको छ ।