प्रधानमन्त्रीको कदम राजनीतिक स्थिरतासँग मेल खाँदैन : नेता सिंह

नेपाली कांग्रेसले प्रतिनिधिसभा विघटनको विरोधमा मुलुकका ७५३ वटै पालिकामा आज विरोध र्‍याली र सभा गरेको छ । 

उक्त पार्टीको काठमाडौं महानगर समितिद्वारा यहाँ आयोजित विरोध र्‍याली शान्तिबाटीकाबाट शुरु भई शहरको विभिन्न भागको परिक्रमा गरी बसन्तपुरमा पुगेर सभामा परिणत भएको थियो ।


Advertisement

सभामा पार्टी नेता प्रकाशमान सिंहले संविधानले दिँदै नदिएको अधिकार प्रयोग गरी प्रधानमन्त्रीबाट भएको प्रतिनिधिसभा भङ्गको घटना सविधान र लोकतन्त्र विपरित भएको आरोप लगाए । 

पूर्वउपप्रधानमन्त्री सिंहले भने, 'प्रधानमन्त्रीको कदम लोकतन्त्र र गणतन्त्रको स्थायित्वको विपरितमा छ, न्यायपालिका, कार्यापालिका र व्यवस्थापिकाबीच शक्ति सन्तुलन हुनुपर्छ भन्ने लोकतान्त्रिक मूल्य मान्यतासँग मेल खाँदैन ।'


Advertisement

न्यायपालिकाबाट उत्पन्न विवादका सम्वन्धमा कसैलाई अन्याय हुने गरी निर्णय आउँदैन भन्नेमा आफू विश्वस्त रहेको बताउदै नेता सिंहले भने,'हल्ला त अनेकौं चलेका छन्, न्यायमूर्तिले देशको भविष्यलाई स्थिरतामा लैजाने सोचेर निर्णयमा पुग्नुहुनेछ , विश्वास गरौँ न्यायालयबाट सही व्याख्या आउनेछ ।' 

राजनीतिलाई सही मार्गमा हिडाउन सकियो भने मात्र स्थिरता र विकास सम्भव छ भन्दै उहाँले बाटोबाहिर गएको संविधानलाई सही मार्गमा ल्याएर राष्ट्रिय राजनीतिलाई स्थिरताको बाटोमा हिडाउन नेपाली कांग्रेसले निरन्तर लागि रहने दृढता व्यक्त गरे ।

सो अवसरमा काठमाडौं उपमहानगरपालिकाका उपप्रमुख हरिप्रभा खड्गी, प्रदेशसभा सदस्य नरोत्तम वैद्यलगायतले प्रतिनिधिसभा विघटनपछि उत्पन्न विवादको निरुपण भनेको संसद्को पुनःस्थापना एकमात्रै बाटो भएको धारणा व्यक्त गरे ।

यसैबीच, प्रतिनिधिसभा विघटनको विरोध र पुनःस्थापनाका लागि माग गर्दै वरिष्ट चिकित्सक डा गोविन्द केसी, पत्रकार नारायण वाग्ले, अधिवक्ता ओम अर्याललगायत नागरिक समाजका अगुवाले माइतीघर मण्डलामा आज विरोध प्रदर्शन गरे ।

सवैधानिक सर्वोच्चता र न्यायिक सुशासन कायम गरियोस्जस्ता नारा लेखिएको प्लेकार्ड लिएर एक घन्टा उभिएर प्रदर्शन गरेपछि डा केसी र पत्रकार वाग्ले जनताको सेवाका लागि गठित सरकारबाट नै संविधानको गलत व्याख्या र प्रयोग भएकाले न्यायालयबाट संविधानको  संरक्षण र सही व्याख्या होस् भन्ने अपेक्षा गरिएको बताए ।

कमेन्ट गर्नुहोस्