लुम्बिनी प्रदेशका मुख्यमन्त्री एवम् नेपाल कम्युनिस्ट पार्टी (नेकपा ओली समूह) का स्थायी कमिटी सदस्य शंकर पोखरेलले माधव कुमार नेपालले जनयुद्धका समयमा पनि प्रचण्डसँगको सहकार्य थियो भन्दा आफ्नै पार्टी विरुद्धको घात हुने बताएका छन् । 

आइतवार सामाजिक सञ्जाल फेसबूकमा एक स्टाटस लेख्दै नेता पोखरेलले नेता नेपालले जारी गरेको निर्देशन अनुसार  तात्कालिक माओवादी उग्रवामपंथको राजनीतिक विरोध र प्रतिवाद गर्दा नेता यदु गौतम लगायत तात्कालिन एमालेका झण्डै ५०० कार्यकर्ताले जीवन बलिदान गर्नुपरेको समेत स्मरण गरेका छन् । 

उनले नेता नेपाललाई भनेका छन्,'माधव कमरेड तपाईले जारी गरेको निर्देशन अनुसार तात्कालिक माओवादी उग्रवामपंथको राजनीतिक विरोध र प्रतिवादगर्दा कमरेड यदु गौतम् लगायत तात्कालिक एमालेका झण्डै ५०० कार्यकर्ताले जीवन वलिदान गर्नु भएको थियो । तर आज तपाई कमरेड प्रचण्डसंग सुरुदेखिनै सहकार्यमा रहेको दावीगर्दै हुनुहुन्छ । शान्तिप्रकृयामा ल्याउन वार्ता गर्नु र सहकार्य गर्नु फरक होला नि कमरेड । त्यतिवेला साच्चै माओवादी नेता प्रचण्डसंगको सहकार्य रहनु भएको हो भने त्यो पार्टी विरुद्धको घात भएन र  कमरेड ?'

विधि र पद्धतीमा जोड दिने भन्दै नेता पोखरेलले अहिले प्रचण्डसँगको साँठगाँठको  औचित्य पुष्टि गर्नका लागि आफ्नै मान्यताका विपरित नवोलेको भए हुने भन्दै नेता नेपाललाई सुझाव समेत दिएका छन्।

उनले भनेका छन्,'शान्तिप्रकृयामा प्रवेश पछि त हामी सबै सहकार्यमा होइन एकतामा नै बाधिएका हौ । त्यो भन्दा पहिले लामो समयसम्म तपाईकै नेतृत्वमा माओवादी उग्रवामपंथ विरुद्ध वैचाारिक तथा राजनीतिक संघर्षमा रहेको कुरा सत्य होइन र ? यति छिटै इतिहासको कटु सत्यलाई कसरी विर्सन मिल्छ र ?'