चीनले विगत दुई वर्षदेखि गोप्य सर्वेक्षण जहाजको सहायताले भारतको जासूसी गरिरहेको भारतीय पत्रिका नवभारत टाइम्सले लेखेको छ । 

जासूसी गर्ने क्रममा चिनियाँ जहाजले राडारमा नपर्नका लागि उपकरण बन्द गर्ने गरेको पत्रिकाले उल्लेख गरेको छ । इन्डोनेसियाका अधिकारीहरूले केही दिनअघि चीनको यस सर्वे जहाजलाई देशको जलसीमा नजिक समातेपछि यसको खुलासा भएको हो । 

यसअघि पानीमुनि चल्ने एक चिनियाँ जासूसी ड्रोन पनि इन्डोनेसिया सीमा नजिक भेटिएको थियो । 

सर्वे गर्ने जासूसी जहाजको नाम शियाङ याङ होङ हो । जहाज ६ जनवरी मा चीनको हाइनान टापुको सान्याबाट निस्केको थियो । 

जहाजलाई इन्डोनेसियाको कोस्ट गार्डले जनवरी ११ मा सुन्डा स्ट्रेट नजिक समातेको थियो । यो महत्त्वपूर्ण स्ट्रेट भएर जाने प्रत्येक जहाजले अटोमेटेड इन्फर्मेसन सिस्टम अन राख्नुपर्छ तर चिनियाँ जहाजले त्यो गरेन । 

इन्डोनेसियाको कोस्ट गार्डले सोधपुछ गर्दा चिनियाँ टोलीले सिस्टम खराब भएको बहाना बनायो । 

रक्षा वेबसाइट द ड्राइभको रिपोर्टअनुसार, जासूसी ड्रोनहरूबाट उपलब्ध सूचनाका आधारमा चीनका घातक पनडुब्बीहरू दक्षिण चीन सागरबाट सजिलै हिन्द महासागरसम्म पुग्न सक्छन् ।